Hemserekîya Konseya Rayberdişî ya KCK’yî seba wefatê hunermend Kadîr Înanirî mesajê serweşîye waşana û wina vat: “Kadîr Înanir, do bi hunermendîya xo û şexsîyetê xo yo demokrat nêro vîrrakerdiş û do zerrîya şarê ma de her tim biciwîyo.”
Eşkerayîya Hemserekîya Konseya Rayberdişî ya KCK’yî de ame vatiş ke hunermed, roşnvîr û demokrat Kadîr Înanir wefat kerdo. Ma serweşîye keye, merdim, komelê hunerî û şarê Tirkîye rê wazenê. Kadîr Înanir, do bi hunermendîya xo û şexsîyetê xo yo demokrat vîrê şaran de biciwîyo. Tirkîya demokratîk a ke pêro şar, komelê dînî, cinî û kedkarî te de azad û seyyewbînî biciwîyê -na hesreta ey bî- do qetî bêra awankerdene.
Kadîr Înanir, seba hunermend û roşnvîranê Tirkîye, wayîrê vindertişêko demokratîk bi. Hetanî peynîya cuya xo, no vindertişê xo ra tawîz nêda û şexsîyetê xo yo azadfikir pawit. Vera teda û neheqîyan helwest girewt, pêro komel û grûbanê bindestan de empatî kerdêni. Bi na tabetmendîya xo, sey yew şexsîyetêko muhîm tarîxê Tirkîye de cayê xo girewt.
Kadîr Înanir, dostêko ercaye ê şarê kurdî bî. Siyaseto ke şarê kurdî ser o ameyni rayraberdiş, qetî qebul nêkerdêni û reaksîyon mojnayêni. Ey bawer kerdêni ke ganî şarê kurdî zî bi ziwan, nasname û kulturê xo bi hawayêko azad bicuyê. Na bawerîya xo zî bi fikr û helwestê xo dîyar kerdêni. Vera ferasetanê şovenîst ê ke komelî parekerdêni de helwest girewtêni û înan sey xirabî dîyîni. Bi şexsîyet û vindertişê xo, vera nê tewir feraset û sîyasetan reaksîyon mojnayêni.
Qebulkerdişê Rayber Apo sey Rayberê Şarê Kurdî, kerekterê ey yo azadîwaz û demokrat dîyar kerdêni. Sey şarê Cezayîrî ke helwestê Jean-Paul Sartreyî vera îşxalkerdişî xo vîr ra nêkerdo, şarê kurdî zî do helwestê Kadîr Înanirî seba azadîye her tim bîyaro xo vîr.
Şarê kurdî sey pêro şaranê Tirkîye, do Kadîr Înanirî bi hawayêko layiqê oxir bikero. Do wayîrvejîyayîşê Kadîr Înanirî tîya ra tepîya zî dîyar bikero.
