Hemserekê DEM Partî Bakirhanî ke qerarê qeyyûmî rê reaksîyon nîşan da, seba tayînkerdişê qeyyûmî va “suîkasto sîyasî yo”. Hatîmogullari zî va “Aştî bi qeyyûman nê, bi azadîyan yena pêardene”.
Mersîn de 10ê Çeleyî de operasyonê keyeyan de Hemşaredarê Şaredarîya Akdenîzî Hoşyar Sariyildiz û Nurîye Aslan û endamê Meclîsê Şaredarîye Ozgur Çaglar, Neslîhan Oruç, Hîkmet Bakirhan ameyî tepiştiş. Qeymeqamê Akdenîzî Zeyît Şener sey qeyyûm tayînê şaredarîye bî.
Hemserekê DEM Partî Tuncer Bakirhan û Tulay Hatîmogullari qerarî rê reaksîyon nîşan da.
Bakirhanî hesabê xo yê Xî ra va “No suîkasto sîyasî yo ke hêvîya aştîya şaran rê ameyo kerdene.”
Bakirhan: Suîkasto sîyasî yo
Parekerdişê Bakirhanî wina bî:
“Derheqê Hemşaredaranê Şaredarîya Akdenîzî Hoşyar Sariyildiz û Nurîye Aslanî de qerarê tepiştişî ame girewtiş. Dima ra zî qeyyûm tayînê şaredarîye bî.
Hemşaredarê û endamê meclîsê ma yê Şaredarîya Akdenîzî operasyonanê qirkerdiş de ameyî girewtene. Qeyyûm ame tayînê şaredarîya ma ke bi îradeyê şarê Akdenîzî weçînîyaybî.
Tayînbîyayîşê qeyyûmî şaredarîya ma ya Akdenîzî rê darbeyêka eşkera ya ke demokrasî rê ameya kerdene. Suîkasto sîyasî yo ke hêvîya aştîya şaran rê ameyo kerdene. Ma red kenê.
Yew hete ra qalê aştîya zereyî bena la heto bîn ra xesbê îradeyê şaran vindertişê aqilî yo. Ma veng danê ke dest nê vindertişê aqilî ra bêro antene. Ma soz danê ke ma do vera zordarîya qeyyûmî, darbeyê ke vera demokrasî benê û dişminatîya kurdan têkoşînê xo yê demokratîkî hîna berz bikê. Zalimî û zordarî do vindê, şar do bi ser bikewo!”
Hatîmogullari: Ma xesbê îradeyî qebul nêkenê
Hatîmogullari zî parekerdişê xo de va “Aştîya zereyî bi qeyyûmî nê; bi demokrasî û azadîyan yena pêardene.”
Parekerdişê Hatîmogullari wina bî:
“Hukmatî bi destê dadgerîya ke fermanê ey de ya, reyna darbe kerd îradeyê şarî rê. Hemşaredarê ma yê Şaredarîya Akdenîzî Nurîye Aslan, Hoşyar Sariyildiz û endamê meclîsî ameyî tepiştiş û herinda înan de qeyyûm ame tayînkerdiş. Rîpelanê tarîxê Tirkîya yê sîyayan rê yewna rîpel ame zêdekerdene.
Qeyyûm înkarê îradeyê şarî yo. Zordarîya pakkerdişê parçeyanê demokrasî yê peyênan o. Zordarîya qeyyûmî şîfreya talanê bajaran a.
Aştîya zereyî bi qeyyûmî nê; bi demokrasî û azadîyan yena pêardene. Ma ke wazenê hêvîya aştî hîna gird bikê, ma nê xesbê îradeyî qebul nêkenê!
Ma veng danê herkesê ke bawerîya xo bi demokrasî û aştî ano ke vera zordarîya qeyyûmî ya hukmatî helwêstêko demokratîk nîşan bidê. Qeyyûmî do şêrê û ma do teqez biserbikewê!”
