Şarê Efrînî ke bi zorî erdanê xo ra ameyî vetene, badê Peymana 29ê Çeleyî wazenê agêrê erdanê xo la îşxalê dewleta tirke agêrayîşê înan asteng keno.
Goreyê Peymana 29ê Çeleyî ganî dewleta tirke îşxalê xo yê Efrînî biqedêno û wayîrê erdan şêrê agêrê bananê xo. La seba ke Tirkîye îşxalî de israr kena, hem agêrayîşê efrînijan asteng kena hem zî peymane sabote kena. Vera heme astengan zî şaro ke reya 4. cayê xo ra koçber bîyî, qerardar ê ke bilez û biemnîyet agêrê cayê xo.
Ehmed Bekîr ke badê Reqa û Tebqayî Amûdê de ame bicakerdene, vat ke çekdaranê hukmatê demkî cehd kerdo ke înan bikişê û qiseyê xirabî kerdî. Bekîrî vat ke çiqas asteng û zehmetî bibê zî ê wazenê agêrê Efrînê xo.
Koçbere Nezîre Henan zî waştişê agêrayîşê Efrînî kerd û vat: “Ma qederê xo nêzanê. Ma wazenê agêrê. Ma xurbetîye ra betilîyayî. Ma wazenê biemnîyet û aramîye erdê xo ser o biciwîyê.”
Koçbere Evîne Mihemed zî vat: “Ma nêzanê dişmen ma ra çi wazeno. Heme gedeyê ma koçberîye de ameyî dinya û nêzanê ke ê kotî ra yê. Ma wazenê bihurmet hêzanê xo reyde agêrê. Ma heta key koçber bibê?”
