TOHAV’î derheqê Heqê Hêvî de raporêko 70 rîpelan eşkera kerd û vat ke Tirkîya bi hewayêko sîstematîk nê heqî binpay kena: “Pergalo ke hêvîye qedexe bikero, rûmetê merdiman zî qedexe keno.”
Weqfa Cigêrayîşanê Komelkî û Huqûqîyan (TOHAV) derheqê Heqê Hêvî de ke seba Rayberê Şarê Kurdî Abdullah Ocalanî û zaf tepîşteyanê sîyasîyan ê kurdan de raporêko hîra hazir kerd. Rapor bi kurmancî û tirkî ame weşaneyene. Îdarekara TOHAV’î avûkate Zozane Vargun xulasaya raporî wend.
Raporî de ame vatene ke Heqê Hêvî heqêko bingeyîn o ke hêvîyanê kesêkî yê seba ameyoxê xo û îhtîmalê bedilîyayîş û newe ra entegrebîyayîşê ci yê komelî paweno. DMME dewayanê Ocalan, Kaytan, Gurban û Boltanî de qerar dayo ke rejîmê hukmî tepîşteyanê hetaheta yê girankerdeyan rê Heqê Hêvî hewanano. DMME resaye netîce ke mekanîzmayê verdayîşê bişertî çin ê yan zî tena teorîk de est ê û peymane binpay bena.
Komîteya Wezîranê Konseya Ewropa zî Tirkîya waşt ke madeyo 107/16 ya qanûnê 5275î Heqê Hêvîye pratîk de bi ca bîyara. La Tirkîya hema gamê lazimî nêeştî.
Rapor vano ke ganî: mekanîzmayêka nirxnayîşo xoser, şefaf û biserûber bêro awankerdene; heqê veradayîşê bişertî bê îstîsna bêro dayene; şertê hucreyê yewkesî bêrê hewanayene û datayê tepîşteyan biserûber bêrê vila kerdene.
Rapor peynîye de vano: “Heqê Hêvî tena çekuyêka huqûqî nîya seba dewamê merdimîyetî û demokrasîye bingeyêko mecbûrî yo. Pergalo ke hêvîye qedexe bikero, rûmetê merdiman zî qedexe keno. Garantîkerdişê Heqê Hêvîye, şerto verên ê pawitişê rûmetê merdiman û ameyoxê demokratîkî yê Tirkîya yo.”
