Koçberê Efrînî yê ke nika stargehê Girkê Legê de ciwîyenê, wazenê ke îşxalê erdanê înan biqedîyo û biemnîyet biagêrê ban û dewanê xo yê Efrînî.
Koçberê Efrînî ke nika bajarê Girkê Legê de manenê, ANHA rê qisey kerd û waştişê xo îfade kerdî.
Emele Qenber ke 3 rey bi zorî bîya koçbere, vat ke koçberîya peyêne zaf çetin bîye û otomobîlê înan rayîr ra xirab bî. Badê ke resayî stargehî, hewcedarîyê bingeyinî ameyî temînkerdene la waştişê înan ê serekeyî agêrayîşo biemnîyet o.
Ehmed Sîdoyî ke 4 rey bi zorî koçber bîyo, vat ke dejê şarê koçberan nê şertanê çetinan ê koçberîye ra nîyo, erd, ban û milkê înan Efrînî de îşxal bîyê, dejê înan ey ra yo. Sîdoyî waşt ke wextêko kilm de biagêrê Efrînê xo.
Meryeme Mela Nesanî ke 4 rey ameye koçberkerdene, vat ke şarê Efrînî wextê peyênî de zehmetîyê girsî antî, zaf keyeyî mecbûr mendî ke şertê çetinî yê zimistanî de rayîran ra bimanê û gedeyan û cinîyan dejê giranî antî. Meryeme vat ke şar wazeno agêro ban û dewanê xo, banê înan ra şarî xerîbî bêrê vetene û ê biemnîyet agêrê keyeyanê xo.
