Dayîkê Aştî yê Stenbolî bi munasebetê serrgêra komployê vera Rayberê Şarê Kurdî Abdullah Ocalanî ameyo kerdene, wina vat: “Serekê ma ame girewtene labelê Serek bi têkoşîn û xoverdayîşê xo nê komployî binvist. Heta ke Serekê ma azad nêbo ma do xover bidê.”
15ê sibata 1999î de Rayberê Şarê Kurdî Abdullah Ocalan bi komployêko mîyanneteweyî amegirewtene û teslîmê dewleta tirkan ame kerdene. 15ê sibate mîyanê şarê kurdî de sey “Roja Sîyaye” yena pênasekerdene. Endamanê Înîsîyatîfê Meclîsê Dayîkanê Aştî yê Stenbolî, derheqê 15ê sibate de ajansê ma rê qisey kerd.
‘Ma xover bidê û serkewê’
Dayîka Aştî Rewşan Doner komployî şermezar kerd û wina dest bi qiseykerdişê xo kerd: “Komplo çend serran ver dest pêkerdbi. Wexto ke ma eşnawit ke Rayberê Şarê Kurdî ameyo girewtene ez zaf xemgîn bîya. La Raybertî bi gamanê xo komployî pûç kerd. Şarê kurdî zî her ca de ey rê wayîr vejîya. Ma hêvîdar ê ke Heqê Hêvî bêro caardene û Raybertî azad bibo. La ganî ma seba azadîya Raybertî bixebitîyê û yewîya şarê kurdî awan bikerê. Ewro komployo 2. esta. Ma do xover bidê û serkewê.”
‘Serekê şarê kurdî azad bo pêroyê şarê kurdî zî azad bibo’
Dayîka Aştî Emîne Erbek zî wina vat: “Dejê 15ê sibatê zaf giran bi. Şarê kurdî çend rojan hemverê komployî waran de bi. Bi 15ê sibate rojêka sîyaye şarê kurdî ser o ameye kerdene la bi xoverdayîş roştîye vejîya. Ewro prosesêk est o, ma zanê ke Serekê Şarê Kurdî azad bibo do pêroyê şarê kurdî zî azad bibo. Bi nameyê ‘aştî’ wazenê şarê kurdî bixapênê la şarê kurdî nêyeno xapênayene.”
‘Dewlete goreyê prosesî game bierza do Serekê ma azad bibo’
Dayîka Aştî Guluşe Yilmaz vat aye wexto ke 15ê sibate eşnawito wirzîyayê lingan ser o û wina vat: “Ma aştî wazenê. Nê prosesî de şarê kurdî gamê muhîmî eştî. Ma wazenê ke dewlete zî goreyê prosesî game bierza û Serekê ma azad bibo.”
‘Ma serrgêra 27. ya 15ê Sibate de zî qadan de bibê’
Dayîka Aştî Ayten Toprak vat: “Girewtişê Rayberê ma seba ma rojêka girane bîye. Heme şarê kurdî kewtî waran û xover da. Heta ke Serekê ma azad bibo ma do xover bidê. Ma do serrgêra 27. ya 15ê sibate de zî waran de bibê.”
