Endamanê Komîsyonî yê DEM Partî dimayê qebulkerdişê raporê hemparî eşkerayîyêk daye û dîyar kerd ke nika ra pey zaf muhîm o û vat ganî pêşnîyazê raporê hemparî bilez bibê qanûn.
Komîsyonê Meclîsî kombîyayîşê xo yê peyên yanî 21. kerd. Encamê kombîyayîşî de raporo hempar bi raydayîşî ame qebulkerdene. 51 endamanê komîsyonî ra 47 endaman sey “eya” raye da. 2 kesan bi hewayêko negatîf raye da û kesêkî zî ne pozîtîf û ne negatîf raye da. Bi nê hewayî raporo hempar ame qebulkerdene. EMEP û TÎPî bi hewayêko negatîf raye da. Endama Komîsyonî ya CHP’yî Turkan Elçî zî ne pozîtîf û ne zî negatîf raya xo nêşuxulnaye. Dimayê qebulkerdişê raporê hemparî xebatê komîsyonî qedîyayê.
Endamê komîsyonî yê DEM Partî dimayê qebulkerdişê raporî eşkerayî daye. Serekwekîla Grûba DEM Partî Gulîstan Kiliç Koçyîgît îfade kerd ke rixmê kemaneyan zî Komîsyonê Meclîsî wezîfeyê xo ardo ca û wina vat: “Maddeyê 6 û 7. zaf muhîm ê. Nika ra pey zaf muhîm o. Ganî meclîs nika ra pey pêşnîyazê qanûnanî ke raporo hempar de ca girewtê bi hewayêko lezgîn bikero qanûn.”
‘Bi vatişê terorî ma nêeşkenê aver şêrê’
Koçyîgît persê derheqê Rayberê Şarê Kurdî Abdullah Ocalanî ser o nê cewabî da: “Birêz Ocalan vengdayîşê 27ê Sibate yê Aştî û Komelê Demokratîkî kerd. Birêz Ocalan aktoro tewr sereke yê prosesî û aştîya herême yo. Ma fikir û pêşnîyazanê birêz Ocalanî ra cîya nêfikirîyenê. Problemêko tarîxî yo. Hetê ci yê sîyasî, aborî, kulturî û huqûqî est ê. Seba çareserîya înan gamî ameyê eştene. Seba ey zî ganî ma ziwanê xo zî rast bikerê. Bi vatişê ‘terorî’ ma nêeşkenê aver şêrê.”
‘Nika demê viraştişê qanûna o’
Endama Komîsyonî Meral Daniş Beştaş zî dîyar kerd ke qebulkerdişê raporê hemparî tarîxî yo û wina vat: “Bi 47 vengan qebulkerdişê raporî zaf muhîm o. No zî mojnenı ke bi mîlyonan kesî piştgirîya prosesî kenê. Seba caaardişê qeraranê Mehkemaya Heqanê Merdiman a Ewropa waştişê awankerdişê mekanîzmayêk zaf muhîm bi. Sewbîna pênaseyê azadîya raman û fikirî çarçewaya ‘terorî’ de nêyeno pênasekerdene. Seba huqûqê Tirkîya zaf muhîm o. Nuqtayêka bîn a muhîme heqê hêvî yo û pênaseyê veradayîşê bi şert o. Ganî aktoro sereke yê prosesî birêz Ocalan bi hewayêko azad bieşko bixebitîyo. Nika ra pey ganî êdî xebatê qanûnî bilez bêrê kerdene.”
