Platformê Sazgehanê Demokratîk Wan de derheqê serrgêra yewin a vengdayîşê Aştî û Komelê Demokratîk ê 27ê Sibata 2025î eşkerayî daye. Hemserekê Wanî yê DEM Partî Veysî Dîlekçî eşkerayî de bale ant şert û mercanê Abdullah Ocalanî ser o û vat: “Ganî bilez heqê hêvî bêro caardene.”
Platformê Sazgehanê Demokratîk Wan de derheqê serrgêra yewin a vengdayîşê Aştî û Komelê Demokratîk ê 27ê Sibata 2025î yê Rayberê Şarê Kurdî Abdullah Ocalanî Qadê Şaristanî de eşkerayî daye. Dayîkê Aştî, aktîvîstê TJA’yî, endam û rayberê DEM Partî û Partîya Herêman a Demokratîke (DBP), sazgehê sîvîlî û xeylê welatijî beşdarê eşkerayî bîyê. Eşkerayî de pankarto ke ser de “Raybero Azad Reyde Ver Bi Komelê Demokratîkî” nuştebi, ame girewtene. Beşdaran sloganê “Bijî berxwedana Îmralîyê”, “Bijî Serok Apo” vatê. Eşkerayî hetê Hemserekê Wanî yê DEM Partî Veysî Dîlekçî ra ameye wendene.
‘Aştî yew hetî nêbena’
Veysî Dîlekçîyî da zanayene ke Rayberê Şarê Kurdî Abdullah Ocalan serrêk ra ver bi îradeyêko xurt vengdayîşê Aştî û Komelê Demokratîkî kerd û wina vat: “Mîyanê serrêk de hetê kurdan ra xeylê gamê şênberî ameyê eştene. Aştî yew hetî nêbena. Meclîs de komîsyon ame awankerdene, nê komîsyonî xebatî kerdê, ya tewr muhîme zî endamê nê komîsyonî şîyê Îmrali û Rayberê Şarê Kurdî reyde pêvînayîş kerd. La gamê ke ganî bêrê eştene, est ê.”
‘Ganî heqê hêvî bêro dayene’
Veysî Dîlekçîyî bale ant gamanê ke lazim ê dewlete bierza ser o û qiseykerdişê xo wina qedêna: “Lazim o bilez şert û mercê ke sermuzakerekerdox birêz Ocalan bieşko bi hewayêko azad bixebitîyo, bêrê caardene. Heqê hêvî ganî bêro dayene. Rixmê qeraranê Mehkemaya Heqanê Merdiman a Ewropayî zî dewaya Kobanî de tu gamî nêeştê û dewamkerdişê qeyuman goreyê ruhê nê prosesî nîyo.”
Eşkerayî bi vatişê sloganê “Bijî Serok Apo” qedîyaye.
