Welatijê ke tewrê “Kombîyayîşê Şarî” yê Bagcilara Stenbolî bîyî dîyar kerd ke heqê hêvî heqo tewr bingeyin o û vat: “Ma pawenê ke wextêko kilm de Serek azad bibo. Azadîya Serekî azadîya şarê kurdî reyde girêdaye ya.”
Rêxistina DEM Partî ya Stenbolî qezayê Esenyurt, Kagithane, Sancaktepe, Kartal û Bagcilarî semedê serrgêra 27ê sibate yê Rayberê Şarê Kurdî Abdullah Ocalan kombîyayîşê şarî viraşt. Welatijê ke tewrê kombîyayîşê Bagcilarî bîyê ajansê ma rê qisey kerd û derheqê raporê hemparî yê komîsyonî ke amebî qebûlkerdene de ewnîyaşê xo ard ziwan û vat rapor de seba kurdan çîyêko şênber ke bêro kerdene çin o.
‘Hetê dewleta Tirkîya ra tu gamêka şênbere nêameya eştene’
Verfekê Herêma Marmara yê DBP’yî Îlyas Demîrî vîr vist ke serê vengdayîşê Rayberê Şarê Kurdî Abdullah Ocalanî ra serrêk derbas bena û vat: “Serek her wext vano ma bi gamêka tarîxî no proses da dest pêkerdene. Hetê kurdî heme gamî eştê, daraxo yewin qedîya. Nika ganî entegrasyono demokratîk dest pêbikero. La hetê dewleta Tirkîya ra tu gamê şênberî nêameyê eştene. Rayberê Şarê Kurdî esîr ame girewtene û no 27 serrî yo Îmralî de xover dano. Bi fikrê Serek Apo ewro Rojhelato Mîyanênî de sîstemêko newe yeno awankerdene. Heqê hêvî, heqo tewr bingeyin o û ganî no heq seba serekî bêro caardene. Ma pawenê ke wextêko kilm de serek azad bibo.”
‘Êdî bes o, ganî Serek mîyanê şarê xo de bo’
Kumrî Akgul zî îfade kerd ke ê bi prosesê “Aştî û Komelê Demokratîk” keyfweş ê û wina vat: “La ma vînenê ke dewleta Tirkîya heta nika tu game nêeşta. Rayberê Şarê Kurdî game eşte. Ganî ewro girewteyê nêweşî û temamî girewteyî bêrê veradayene. Ganî Serekê Şarê Kurdî Abdullah Ocalan azad bibo. Bi azadîya Serokatî do proses aver şoro. Edî bes o, ganî Serek mîyanê şarê xo de bo.”
‘Azadîya Serekî azadîya şarê Kurdî ya’
Sefer Kurbanî dîyar kerd ke vengdayîşê Abdullah Ocalanî rayîrêko newe şarê kurdî rê akerdo û wina vat: “Ganî şar zî serê no rayîrî de bixebitîyo ke Serekî akerdo û destê Serekî xurt bikero. Ma zanê ke azadîya Serokatî azadîya şarê kurdî ya. Ma hêvî kenê ke Serek wextêko kilm de azad bibo. Azadîya Serekî azadîya şarê kurdî reyde girêdaye yo.”
‘Seba aştî ganî Serek azad bibo’
Huseyîn Arvasî zî dîyar kerd ke ganî ewro pêroyê girewteyî bêrê veradayene û wina vat: “Ganî ma yewîya xo mîyanê xo de awan bikerê. Şarê kurdî her çar hetê Kurdîstanî de ganî azad biciwîyê. Ma ewro sînoran nas nêkenê. Kurdîstan çar parçe nîyo. Seba aştî zî ganî Serek azad bibo.”
