Îzmîrî de avûkatêk ke waştbî beyanê muwekîleyê xo yê ke vatbî verê îfadedayîşî îşkence dîyo, bêro qeydkerdene, bi sûcdarkerdişê “îftîrakerdişê polîsan” ame destbendkerdene û şawîya dadgehe.
Eşkerayîya Baroyê Îzmîrî de ame vatene ke seba avûkatî qerarê destbendkerdişî hetê dozgerê nobedarî ra ameyo dayene. Baroyî vat ke avûkato ke wazeno îddîaya îşkenceyî qeyd bikero bêro destbendkerdene, huqûqî nîyo.
Baroyî dîyar kerd ke wezîfeyê dozgerî cigêrayîşê îddîaya îşkenceyî û seba berpirsîyaran caardiş o û waşt ke avûkat lez bêro azadkerdene. Eynî wext de venga Heyetê Dadger û Dozgeran (HSK) da ke seba ê dozgerî cipersayîşê lazimî dest pêbikerê.
