Wekîlê DEM Partî Salîha Aydenîz (Mardîn), Aytene Kordu (Dêrsim), Adalete Kaya (Amed), Cengîz Çîçek (Îstanbul) û Omer Faruk Hulaku (Çewlîg) goreyê madeyê 98. yê Qanûnê Esasî seba pawitişê kirmanckî (zazakî) ke binê talûkeyê vindîbîyayîşî de ya, Cigêrayîşê Meclîsî arz û teklîf kerd.
Wekîlan ard ziwan ke kirmanckî ke ziwananê tewr qedîmanê cografya Anatolya û Mezopotamya ra yew a, hetê mîlyonan hemwelatîyan ra yena qiseykerdene la netîceya texrîbatan de ke modernbîyayîş, şaristanbîyayîş û qedexeyanê ke bi serran dewam kerd, ewro hemverê prosesê vindîbîyayîşî de ya ke telafîyê ey zehmet o.
Wekîlan ard vîrî ke UNESCO Atlasê Ziwananê Binê Talûkeyî de kirmanckî kategorîya “bêasayîş” de bi ca kerda û rapor kerdo ke eke lezabez tedbîr nêgîrîyo ziwan do vindî bibo. Wekîlan vat ke vîyartişo xozayî ke dadî-babî ra vîyareno domanan, ameyo noqtaya vinderdişî û ziwan tena mîyanê neslanê pîlan de qisey beno.
Wekîlan teklîfê xo de waşt ke bi datayanê rojaneyan rêjeyê qiseykerdişî û vilabîyayîşê herême yê kirmanckî bêro tesbîtkerdene, astengê vernîya perwerdeyê ziwanê dayike bêrê cigêrayene, raştkerdişê qanûnî yê ke seba teşwîqê şuxulnayîşê warê pêroyî lazim ê, bêrê ewnîyayene û bi zanayîşanê însîyatîfanê sîvîlan û akademîyî “Planêka Çalakîye ya Lezabeze” bêra amadekerdene.
