Zimistan ke ame, vewre kî varaye, şandî wext beno wextê vatişê sanikan. Mînzur Zengîn, sobaya xo veşneno, hetê soba de ronişeno, zereyê keyeyî beno germ, ma rê qalê sanikan û ziwanî keno wina vano: “Sanik ke bîyê vîndî, zon beno hûsk şono.”
Mînzur Zengîn, Dêrsim Pulur de, dewa Kedeke de weşîya xo ramneno. 80î serrî yo. Wextê xo zereyê keyeyî de vîyarneno. Yew o ke le xo de nîşte ro, cîran ke ameyê meymanîye, laye hêybe xo keno ra, sanik înan rê yenê comerdîye. Minzûr Zengîn, qomê verên ser, ziwan û sanikan ser o ajansê ma rê qisey kerd.
‘Sanikî Şîye Zonî yo’
Minzûr Zengîn, qomê veren ser o qisey keno û wina vano: “Verên de ma nîştêne ro, hedrîya jûmîn ardene, sanikî vatene, lawûkû vatene. Zone xo de qisey kerdene. Cef zaf bî. Kokime ma, vatene ke zone ma, zone de Xizir yo. Sare veren zaf rind bî. Sûnde ke bî, perûne ameyne peser, sanike vatene. Sanik xeleşîyene, sanike bîn vatene. Sanike Bize Kol bî, sanike Milçik û Verg bî. Pîre bî, Hes û Lûye bî. Kam ke qefelîya, jûye bîn vatene. Ma zere Sanik de, kare xo, cîranîye xo, laxe xo, hûyîyayîş û jîvayîşe xo, jûre xo, dizdenîye xo, çike bîyane merdem de esta, vejîyene tever. Sanik ra tepa, venge kam ke ves bî, ma re lawûke vatene. Jede Zimistan sanik vatene. Zimistan ke ame hatan sûnde zere mal de kare xo kerdene. Tepa ameyme jû ca, qiseykerdene, ma de her çi rind bî.”
‘Pêrûne pîya zonê xo rê wayîr vecîme’
Minzûr Zengîn, peynîya qiseykerdîşe xo de, 21ê Sîbate Roja Ziwanê Dayîke ya Dînya ser o qisey kerd û wina vano: “Zonê ma tengêye der a, qomê ma jede zonê xo qisey nêkenê. Zonê ma teyna kokime ma qisey kenê. No zon ser kam ke xebetîyeno vane ke zon hîn ke şêro beno vîndî. Halê ma se beno nêzanîme. Sanikê ma towa nêmendo, sanikî şîye zonî yo, sanikî sanatê ma yo. Qomê xo ra vanîme ke, zonê xo, xo ra dûr mekerê.”
