Colemêrg de 23ê sibate de sazgeha ziwanî ZIWAN-DER do abîyo. Îdarekaranê komele vat ke abîyayîşê komele seba înan serberzkerdişêk o û dewam kerd: “Ma do ziwanê xo hemverê heme qedexe, asteng û zordestîye de bipawê.”
Komela Cigêrayîş û Averberdişê Ziwanê Kurdî (KURDÎ-DER) 21ê teşrîna peyêne ya 2016î de bi fermanê qanûnî ameybî girewtene. Girewtişî ra ver bi 34 şûbeyê xo bajar û qezayanê Vakurê Kurdîstanî de seba ziwanê kurdî xebityayêne. Dima gulana 2017î de Amed de MED-DER, adara 2019î de Wan de ARSÎSA abîyî.
Hemserekê ZIWAN-DER’î Naîf Beyterî vat: “Hedefê abîyayîşê komele averberdişê kultur û ziwanê kurdî yo. Her ca ke merdim tede ciwîyeno, ganî kurdkî bêro qiseykerdene. Ma wazenê ke keyeyê xo domanê xo bierşawê kursanê ZIWAN-DER’î.”
Hemsereka ZIWAN-DER’î Esmere Tekîn vat ke na komele bi hewayêko komunal, bi zehmetî û bawerîye ameya ronayene û venga keyna û lajanê Colemêrgî da ke bêrê ZIWAN-DER’î.
Îdarekarê ZIWAN-DER’î Ezad Eslanî vat: “Ziwan estbîyayîşê merdimî yo. Demêko derg o ke teda û zordestîye ziwanê kurdî ser o est ê. Ma do bi tepêşêko xoverdayox ziwanê xo hemverê nê qedexeyan de bipawê.”
Îdarekarê ZIWAN-DER’î Sabrî Ekbaşî vat ke hazirîyê ameyê qedênayene û nika di sinifê înan est ê ke her yew kapasîteya 15 kesan a û qeyda destpêkerd. 23ê sibate de do bi merasîmêk sazgehe bêra akerdene.
