Hemsereka Pêroyî ya DBP’yî Çîgdem Kilîçgun Uçar kombîyayîşê eşkerakerdişê deklarasyonê 8ê Adare yê Meclîsê Cinîyan ê partîya xo de qisey kerd û vat ke têkoşîno ke cinîê kurdî domnenê, tesîrê xo heme dinya ser o keno û pêşengîya cuya newîye kena û vat: “Gama tewr şênber a têkoşînê ma prosesê Aştî û Komelê Demokratîkî yo. Ma venga heme cinîyan danê ke ney gandar bikerê û hîrayêr bikerê.”
‘Hêrişanê vera Rojava de reyna cinî bîyî hedef’
Kilîçgun vat ke têkoşînê azadîya cinîyanê kurdan nika heme dinya de vila bîyo û bîyo motîvasyon û wina: “Hêrişanê vera Rojava de reyna cinî kerdê hedef û waşt ke bi porê cinîyêka şervane atmosferêkê tersî virazê. La bi pêşengîya cinîyanê Kurdîstanî heme cinîyanê dinya bi mûnitişê porê xo cewab da û nê atmosferî kerd atmosferê azadîye.”
‘Serra keyeyî de teqrîben 400 cinî ameyê kiştene’
Kilîçgun bale ante serra 2025î ya ke sey “serra keyeyî” ameybî îlankerdene ser o û ard vîr ke na serra de teqrîben 400 cinî hetê camêrdanê xo yê tewr nêzdîyan ra ameyê kiştene. Kilîçgun vat ke nê 24 saetanê peyênan de zî Wan, Akseray, Osmanîye, Stenbol û Gebze de 6 cinî ameyê kiştene û vat: “Sebebê nêseypêyîya mabênê cinî û camêrdan serdestîya camêrdî û dewleta camêrdî ya. Raştîya yewine ke ameya sîyakerdene û tarîkerdene raştîya cinîye ya û ma do hemverê ney bi qerardarîye têkoşînê xo bidomnê.”
‘Têkoşînê cinîyanê kurdan tesîrê xo heme dinya ser o keno’
Kilîçgun vengdayîşê Rayberê Şarê Kurdî Abdullah Ocalanî yê 27ê sibate ard vîr û vat: “Wexto ke ma nêzdîyê serrgêra vengdayîşê Aştî û Komelê Demokratîkî benê, qiseyê Birêz Ocalanî yê mesajê xo yê 8ê adare yenê vîrê ma. Ocalan vano, ‘Problemê cinîyan problemê kurdan ra giranêr o.’ Sey cinîyanê kurdan ke nê têkoşînî de pêşeng bîyê û bi felsefeyê ‘Cinî, cuye, azadîye’ ver bi heme dinya şîyê, ma do têkoşîno ke beno global, ey rê bibê pêşeng. Ma venga heme cinîyan danê ke Aştî û Komelê Demokratîkî gandarê bikerê û hîrayêr bikerê.”
