Endama Heyetê Îmralîyî Pervîn Buldan derheqê kombîyayîşo peyên ê Îmralîyî de agahî dayê û vat ke entegrasyono demokratîk senî mumkun o, zelal kerd û dîyar kerd ke nê prosesî de mabênê kurdan de yewîya neteweyî mecbûrî ya.
Endama Heyetê Îmralîyî ya DEM Partî Pervîn Buldan derheqê kombîyayîşo peyên ê Îmralîyî de rojnameyê Yenî Ozgur Polîtîkayî rê qisey kerd.
“Bimoral bî û bala ey prosesî ser o ya”
Buldan vat ke kombîyayîşê peyênî de Rayberê Şarê Kurdî Abdullah Ocalan bimoral, weş û seba averşîyayîşê prosesî bimotîve yo, kombîyayîş teqrîben hîrê û nêm saetî dewam kerd û Rayberê Şarê Kurdî Abdullah Ocalan formê vernuşteyê rojdemê xo heyetî reyde pare kerd.
“Şertanê Îmralîyî de vurîyayîş çin o”
Buldan îfade kerd ke hema şertanê Îmralîyî de weşbîyayîşêko şênber çin o û vat: “Teberê ma ra kesêk ke şono ey reyde kom beno, çin o. Heyetê Îmralîyî aşme de yew rey kom beno. Ganî nê kanalî zafêr bibê, rojnameger, akademîsyen, sîyasetmedarî û beşanê cîya-cîyayan reyde dîyalogê ey bibo.”
“Entegrasyono demokratîk” do senî bibo?
Buldan vat ke Birêz Ocalan prosesî di qonaxan de erjneno: “Birêz Ocalanî vat ke qonaxo yewin temam bi, pêkewtîş qedîya, çekî ameyê ronayene. Bi serûberkerdişê qanûnan ganî entegrasyono demokratîk bêro caardene. No yewbîyayîşo klasîk nîyo. Entegrasyonêk o ke heqê hetan garantî keno, sere de ziwanê dayîke, nasname, kultur û huqûqê şarê kurdî.”
“Rapor erjîyayeye yo la kêmî yo”
Buldan vat ke raporê Komîsyonê Meclîsî erjîyaye yo la di babetan de înan şerhî ronayî: Pênasekerdişê meseleyê kurdî sey “meselayê terorî” û nêzdîbîyayîşo kêmî yê seba ziwanê dayîke. Buldan vat ke ganî rapor komîsyonê pîsporîye rê bêro erşawitene û hazirîya qanûnan bilez dest pêbikera.
“Yewîya neteweyî mecbûrî ya”
Buldan vat: “Hêrişanê vera Rojava reyde ruhê yewîya neteweyî reyna vejîyaye meydan. Ewropa de, çar parçeyan de şarê kurdî her ca ke tede ciwîyenê, tewirê xo mojna. Fikrê Birêz Ocalanî nê babetan ser o her wext zelal o. Yewîya neteweyî sey çîyêko mecbûrî vernîya ma de ya. Başûrê Kurdîstanî de nêzdîbîyayîşê Birêz Barzanî û Birêz Talabanî zaf erjîyaye yo. No ruh peyda bîyo û nika ganî bibo goşt û este.”
