Netîcenameyê 3. Sempozyûmê Ziwanê Dayike yê Mîyanneteweyî ke hetê Egîtîm-Senî ra ame viraştene ame eşkerakerdene. Netîcename de ame vatene ke ganî perwerdeyo zafziwanî bêro dayene û heqê ziwanê dayîke bêro garantîkerdene.
Sendikaya Kedkaranê Perwerde û Zanistî (Egîtîm-Sen) derheqê 21ê Sibate Roja Ziwanê Dayîke ya dinya 3. Mîyanneteweyî viraşt. Sempozyûm salona konferansê yê Yewîya Baroyanê Tirkîya yê qezaya Çankaya ya Anqara de ame viraştene. Xeylê welatanê sey Lubnan, Kafkasya, Afrîkaya Başûr, Îrlanda, Îskoçya, Îspanya (Bask-Katalanya), Holanda, Almanya û Rojava (zoom) kesê babete ra eleqedar tewrê sempozyûmî bîyî.
Sempozyûm badê 3 roniştişan bi forumê ke tewrbîyena beşdaran sempozyûm ser û Roja Ziwanê Dayîke yê Dinya de fikir û ewnayîşê xo ardî ziwan. Dima ra netîcenameyê sempozyûmî ame eşkerakerdene.
Netîcenameyê sempozyûmî hetê Serekê Pêroyî yê Egîtîm Senî Kemal Irmak ra ame wendene. Kemal Irmak maneyê roje ser qisey kerdişêko kilm kerd û netîcename eşkera kerd.
Netîcenameyê sempozyûmî wina yo:
“Cigêrayîşê zanistî û tecrûbeyê mîyanneteweyî mojnenê ke heqê mûsayîşê ziwanê dayîke yê kesêk şertê bingeyin ê averşîyayîşî fehmkerdiş, serkewtena akademîk û têduştîya perwerdeyî de yo. Eksê nê polîtîkayanê perwerdeyî yê serê bingeyê yewziwanî seba kesanê pey ziwanî û kulturî yê cîyareng netêduştîye muessese afernenê; no proses mûsayîşê ziwanî asteng keno. Beno sebebê neheqîyan. Semedê naye ra perwerdeyo zafziwanî yê serê bingeyê ziwanê dayîke tena waştenêk kulturî nîyo, la eynî wextî de hewcedarîyêk pedagojîk û heqêko bingeyin ê merdiman a. Tecrûbeyê mîyanneteweyî yê ke sempozyûm de ameyê parekerdene mojnenê ke modelanê perwerdeyo zafziwanî eşkeno çarçeweyê tarîxî û komelî yê cîyayan de bi hewayêko serkewte bêrê bi ca kerdene. Munaqeşeyê sempozyûmî eşkera kerd ke ganî transfer kerdişê perwerdeyê zafziwanî yê serê bingeyê ziwanê dayîke hetê xo yê pedagojîk, qanûnî û sazgehî de bêro çareser kerdene.”
Kemal Irmak waştenî wina rêz kerdî:
*Garantîkerdişê qanûnî ganî heme astengîyê vernîya heqê perwerdeyê zafziwanî yê serê bingeyê ziwanê dayîke bêrê wedaritene.*Ganî sîstemêk perwerdeyî yê zafziwanî serê bingeyê ziwanê dayîke de heme astanê perwedeyî de bêro ronayene, verdibistan ra dest pê bikero û programanê perwerdeyîyê mamostayan ra bigîro heta mufredato derg bero.
*Ganî Tirkîya bilez şerhê ke serê peymananê mîyanneteweyî yê ke heqê perwerdeyê ziwanê dayîke dîyar kenê bêrê wedaritine.
*Ganî hikmatê herême azadî bê ke bexçeyê gedeyan ê laîk, zanistî, yê bi ziwanê dayîke merkezê ciwanan, kitabxane û merkezê kulturî akerê.
*ganî sîyasetê tayînkerdişê qeyûman bêro qedênayene.”
