Bi wesîleyê 21ê sibate Roja Ziwanê Dayike ya Dinya nuştox Hasan Yurtsever û Hetkarê Serekê Pêroyî yê ÎHD’yî Heqî Demîrî derheqê halê ziwanê kirmanckî (zazakî) û wezîfeyê keyeyan de qisey kerd.
Hasan Yurtsever: “Sebebê têkoşînê ma yo yewin ziwanê ma yo”
Nuştoxo Çewlîgijî Hasan Yurtseverî vat ke kirmanckî lehçeya kurdkî ya verên a la şarê kurdî ziwanê xo mîyanê xo de, domananê xo reyde qisey nêkeno û dima şonê dezgehanê bînan ra vanê “Çira şima ziwanê ma aver nêbenê?” Yurtseverî vat: “No helbet heqê ma yo û ganî ma biwazê zî, la her çîyî ra ver ganî mîyanê xo de, keyeyê xo de çi ke destê ma ra yeno ma bikerê.”
Yurtseverî îfade kerd ke pîrozkerdişê roja ziwanî de zaf xemgîn beno û vat: “Ganî ma pîrozkerdişî ra zêdeyêr bifikrîyê ke çira ziwanê ma ver bi vindîbîyayîşî şino, çira mireno. La çi heyf ke ma kes goş nêdanê nê persan. Eke ma keyeyê xo de dest nêerzê nê karî ziwanê ma aver nêşino. Nasnameyê ma zî girêdayeyê ney o.”
Yurtseverî vat: “Keso ke tirkî qisey keno tirk o, keso ke kurdkî qisey keno kurd o. Eke kesêko kurd bi kurdkî qisey nêkero problemê nasnameyî zî vejîyenê. Ganî ma têkoşînê xo de vengê xo bi ziwanê xo bivejê. Sebebê têkoşînê ma yo yewin ziwanê ma yo, ganî ma ser o vinderê.”
Heqî Demîr: “Ganî her merdim keyeyê xo de ziwanê xo qisey bikero”
Hetkarê Serekê Pêroyî yê ÎHD’yî Heqî Demîrî vat: “Wa her kes ziwanê xo de kar bikero, qisey bikero, leyîranê xo reyde keye de qisey bikero. Mekteban de dersa weçînayîşî est a, wa keyeyî leyîranê xo rê a derse biwazê. Wa dewlete ra vajê ganî leyîrê mi ziwanê mi bimusê. Eke herkes wina vajo dewlete mecbur manena ke rayîr akero.”
Demîrî vat: “Her merdim ganî bi ziwanê xo bibo pîl. Kulturê xo, nasnameyê xo pê ziwanê xo museno. Heme çîyê ma mîyanê ziwanê ma de yê, sanikî, deyîrî kayî û heme çîyê bînî ziwanê ma de yê. Nika êdî TV est o, mektebî est ê, ziwanê ma sey verê nêyeno qiseykerdene, xo bi xo asîmîlasyonî dest pêkerdo. Dewlete çîyêk nêkero zî ziwanê ma vindî beno, ganî ma vernîya ci bigîrê.”
