Rojnameyê Yenî Yaşamî rîpelê xo yê “Qiseykerdişê Dişemeyî” de persê ke rojnamegerî wazenê Rayberê Şarê Kurdî Abdullah Ocalanî ra bipersê, weşanayê.
Zaf rojnamegerî Tirkîya de destpêkerdişê prosesî ra nat seba ke Rayberê Şarê Kurdî Abdullah Ocalanî reyde rî bi rî roportaj bikerê muracatê Wezaretê Edaletî kerd la hema zî tu cewab nêameyo dayene.
Persê rojnamegeran wina ameyê weşaneyene;
Dîcle Muftuoglu – Ajansê Mezopotamya:
Hêrişanê vera Rojavade derheqê yewîya kurdî de çalakîyê muhîmî virazîyayî. La hetê neteweperwestan ra mabênê yewîya kurdî û Netewa Demokratîke de munaqeşeyî vejîyayî. Netewa Demokratîke paradîgmaya yewîya kurdî apey dano?
Banu Guven – Îlke TV:
To mektubêk erşawit Îdareyê Otonomî yê Vakur û Rojhelatê Sûrîye rê û vat ke “plano gird ê Kurdîstan û Rojhelatê Mîyanênî” est o. Aktor û hedefê nê planî ti senî pênase kenê? Eşkerayîya Hakan Fîdanî ya derheqê Iraqî de nê resîmî de ca gêna?
Murat Sabuncu – T24:
Anketî nîşan danê ke beşêko gird ê komelê Tirkîya nameyê to ra dûrî yo û îtîraz keno. Fikrê to est o ke ti bibî aktoro rasterast ê sîyasetê sîvîlî, DEM Partî yan zî partîyêka newîye bi fikr û îdare şekil bigîro? Muhalefeto komelkîye eşkeno bêro averberdiş?
Candan Yildiz – T24:
27 serrî yo ke ti zindanî de yî. Mîmarê prosesî ti yî? Mabênê azadîya to û prosesî de têkilîye est a? Çareserkerdişê meseleyê kurdan ser o “peymana tirktîye” do senî tesîr bikero?
Can Dundar – YouTube:
1993î de Beqa de to mi ra vatbî “Agêrayîşê mi muhîm nîyo, vurnayîşê Tirkîya muhîm o.” 33 serran ra dima Tirkîya senî vurîyaye? Eke ez nê persî reyna bipersî, “Ti eşkenî bifikrî ke ti do rojêk Meclîsî de sîyaset bikerê?”
Amberîn Zamani – Al-Monitor:
Vanê têkilîya to û Mazlûm Kobanî sey “pî-lajî” ya. Erjnayîşê to yê derheqê Kobanî de çi yê? O ke ewro Macronî reyde telefon de qisey keno, ti senî erjnenê? O şkeno bibo sîyasetmedaro rind?
Îrfan Aktan – Kooperatîfê Spot Basinî:
1992î de to vatbî “ez nêwazena ke xo dima şerê mezhebî yê bêpeynîye verda.” Adirbestî, ancîyayîşê 1999î, prosesê 2009 û 2013-15î û heta feshê PKK’yî zî zemînê pêkewtişan çin nêkerd. Gelo ti fikrîyenê ke caardişê xeta to ya îdeolojîk-sîyasîye êdî mumkun nîya?
Oznur Deger – Ajansê Jinnewsî:
“Îdeolojîya Azadîya Cinîyan” ke bi 8ê adare 1998î dest pêkerd, ewro bi felsefeyê “Jin Jiyan Azadî” heme qitayan derbas kerd. Cinîyanê nikayî ti azadîye înan kamcîn qonaxe de vînenê? Seba azadîya komelî kamcîn rayîran ra merdim şêro?
Fatîh Polat — Rojnameyê Evrenselî:
Cumleya ke Sirri Sureyya Onderî bi vatişanê ke to bi destnuşteyê xo nuştbî – “seba çekveradayîş û feshê PKK’yî sîyasetê demokratîkî û huqûqî naskerdişê ci lazim keno” – hetê PKK’yî de gamê şênberî ameyî eştene. La hetê “sîyasetê demokratîk û huqûqî” de teberê komîsyonî ra ma gamêk nêdîye. Çarçeweya muzakerayan de ke ti Îmralîyî de dewam kenê, hetê dewlete ra gamêk est a ke ma do nêzdî de bivînê?
Elîşer Delek — Rojnameger:
Feshê PKK’yî û qedîyayîşê têkoşînê çekdarî de, mabênê “awanîya unîtere” ya dewlete û modelê to yê “Konfederalîzmo Demokratîk” û “otonomî” de cîyayîya ontolojîke bi kamcîn “termînolojîyê huqûqî yo hempar û şênber” do bêro averberdiş?
Semîha Alankuş — Ajansê Jinnewsî:
Cinîyê ke mîyanê şîdetê şerî, dewlet-camêrdî û hêrişanê cuya rojane de ciwîyenê, ‘azadbîyayîş û xopawitiş’ senî eşkenê bêrê îzahkerdene? Tersê azadîye ke zereyê cinîyan de est o, senî tesîr keno têkoşînê cinîyanê rêxistinkerdîyan ser o?
Îrfan Degîrmencî — YouTube:
Derheqê kodkerdişê têkoşeranê heqanê LGBTÎ’yî sey “rêxistine” û hedefgirewtişê înan de çi fîkîrîyenê?
Yildiray Ogur – Rojnameyê Kararî:
Derheqê Selahattin Demîrtaşî de ti çi fîkîrîyenî? Ameyoxê sîyasetê kurdî û Tirkîya de senî eşkeno rolêk bîgîro?
Evrîme Kepenek – Bîanet:
Azo newe demê pêkewtişî nêdîyo la bi keyeyanê xo, vîr û trawmaya kolektîfe musayo. Nê ciwanan rê ti ewro vanê se? Wexto ke lajekêko kurd to ra vajo “Vîyarteyê xo xo vîr ra nêkena la nêzana senî aver şêra” ti do senî cewab bidê ci?
Serdar Altan – Rojnameger:
Feshê PKK’yî û qedîyayîşê têkoşînê çekdar, rêxistina ke do pêşengîya komelê demokratîkî bikera, prosesê vurîyayîşê awanîya kadroyanê ey senî gêno xo dest û muhalefetanê mumkunan senî erjnenê?
Denîz Nazlim – Rojnameyê Solfasolî:
Dewlete îsrar kena ke vengdayîşê çekveradayîş PJAK, YPG/YPJ’yî zî gêno mîyanê xo. Qerarê çekveradayîşî nê hêzanê çekdar ê di welatan zî gêno xo mîyan?
Suna Erdem – Rojnameger:
Destpêkê têkoşînî ra nat poşmanîya to est a? Bi nêzdîbîyayîşê ewroyî gamêk a babetêka cîyayêr est a?
Gurkan Çakiroglu – Nuştox;
Dewlete paradigmaya asîmîlasyonî pey de verda û paradigmaya to ya entegrasyonî qebul kerd. Xeyalê to yê ameyoxî çi yo? Rayîro ke şono “seserra Tirkîya” de gamê to yê ameyoxî çi yê?
Înan Demîrel – Tele-2:
Goreyê AKP û MHP’yî vengdayîşê to yê çekveradayîşî YPG û HSD’yî zî gêno xo mîyan. Na babete de nezelalî est a? Vengdayîşê to YPG’yî zî girewt mîyanê xo?
Hîlmî Hacaloglu – YouTube
Qeydê kombîyayîşê 24ê teşrîna peyêne de to zaf “Komara Demokratîke” ser o qalî kerd û vat “AKP’yî awankerdişê Komara Demokratîke de gamê cidî eştî.” La welatêk de ke qerarê AÎHM’î nêyenê caardene, Selahattin Demîrtaş 9 serrî yo zindan de yo û cîyabîyayîşê qewetî çin bo, ti senî vînenê ke no welat nêzdîyê komara demokratîke beno? “Komara Demokratîke” ti senî pênase kenê?
Huseyîn Kalkan – Rojnameyê Yenî Yaşamî:
Seba pawitişê şorişê Rojava heme dinya de kurdî û dostê înan pay ra bîyê. Nê protestoyanê sîvîl û girseyîyan plankerê qirkerdişê Sûrîye mecbur kerdî ke gamêk apey bierzê. Nê serebûtan ti paradigmaya “Aştî û Komelê Demokratîkî” de senî erjnenê?
Rob Vreeken – De Volkskrant:
Pêkewtişê çekdarî yê 40 serran netîceyêk ard gelo? Teberê mergê bi hezaran merdiman?
Nezahat Dogan – Yenî Yaşam:
Ti vanî “raştpênasekerdişê cinî bingeyê cuya raştikên o.” Ewro ke cinî sey dosyaya Epsteinî de zî yeno vînayene, cendereyê katîlanê kastîkan de yê, senî eşkenê cuya qestikên ke teknolojî, ferdperestî û cinsîyetperestî virazena, tira formûlê “Jin Jiyan Azadî” awan bikerê?
