Herêma Sananîya Wesayîtan a Wanî ke binê tesîrê krîzê ekonomîkî de ya, sebebê vayebîyayîşê parçeyanê wesayîtan hem dikandar hem zî wayîrê wesayîtan probleman reyde rî bi rî yê.
Tirkîya ke krîzo ekonomîk çend ke şino beno xorîn û cuya hemwelatîyan çend ke şino hîna bena çetin. Dikandarê zaf waran seba krîzî xehmetîyan ancenê. Dikandaranê sanayîya Wanî gazinê xo îfade kerdî.
“Esnaf nêşeno debara xo bikero”
Dikandar Murat Çelîkî vat: “Parçeyek ke verê 100 TL bî nika 150-180 TL yo. Ma mecbur ê ke 300-350 TL ra bidê. Kîra zaf zêde ya, bacî zaf zêde yê, esnaf nêşeno debara xo bikero. Parçeyê ke ma roşenê rasterast Çîn û welatanê teberî ra yenê û bi hêzê dolarî ma gênê. Bacanê gumrikî piştîya ma şiknaye.”
“Parçeyê wesayîtan zaf vaye bîyê”
Kedkar Remazan Çîftçîyî vat: “Pereyê ma çin ê ke parçeyan bigîrê. Wayîrê wesayîtan rîyê vayebîyayîşî ra nêşenê wesayîtanê xo tamîr bikerê. Motor bo, şanzuman bo, debrîyaj bo, sebebê vayîye ra nêşenê bivurnê yan zî tamîr bikerê. Herême de ne fabrîqa est a ne zî cayêko bîn ke kar bivînê.”
“Bac û KDV zaf zêde yo”
Dikandar Mazlum Gulmezî vat: “Ma parçeyan roşenê û fatûraya înan gênê. Bacê nê parçeyan zaf zêde yo. Na rewşe seba heme tamîrkaran û wayîranê wesayîtan zaf zehmet a. Ma keda xo danê la vayîya parçeyan, bac û KDV qezencê ma kêmî keno.”
“Bazar çin o”
Dikandar Fatî Zorkulî vat ke kîra sanayî de zaf zêde yê û o aşme de 40 hêzar TL dano. “Bacî zaf ê, malzemeyê ma zaf ê la bazarê ci zaf çin o.”
“Heqdestê hostayan kêmî yo”
Xebatkarê sanayî Kadîr Onatî vat: “Heqê kîra, heqdest û heqê parçeyan zaf zêde yo. 300 metrekare seba nika 40 hêzar TL yo. Rîyê sîgorta, werd ûêb. ra giran ê, heqdestê hostayan kêmî yo. Karê sanayî zaf zehmet o.”
