Serrgêra mesajê Rayberê Şarê Kurdî Abdullah Ocalanî yê 27ê sibata 2025î de, siba Anqara de bi beşdarîya Hemserekanê Pêroyî yê DEM Partî û endamanê Heyetê Îmralîyî kombîyayîşêko çapemenî do bêro organîzekerdene û mesajê Ocalanî yo newe bêro eşkerakerdene.
Hemserekê Pêroyî yê DEM Partî Tulay Hatîmogullari û Tuncer Bakirhan endamanê Heyetê Îmralîyî reyde 27ê sibate roja îne saete 11:00î de Anqara de Sehneyê Yilmaz Guney de daraxê prosesî, erjnayîşê seba ameyoxê prosesî û mesajê Ocalanî yo newe do bêro parekerdene.
‘Beyannameyê 27ê sibate programêko sîyasî yo’
Badê kombîyayîşê 16ê sibate yê Heyetê Îmralîyî reyde mesajê Ocalanî ray pêroyî reyde amebi parekerdene. Ocalanî mesajê xo de vatibî, ‘Prosesê Aştî û Komelê Demokratîkî prosesêk o ke her dem xo newe ra erjneno û strateji û taktîkanê xo belî keno. Ez nê kombîyayîşê xo sey kombîyayîşêkê destpêkî yê entegrasyonê demokratîkî erjnena.”
Ocalanî derheqê têkilîyanê tarîxî yê kurd û tirkan de zî wina vatbi: “Ewro ma do esasê peymeyanê goreyê hemdemî û bi hewayêko ke rasyonalîteyê xo est o, ma do komare reyde bibê yew.Înkarnêkerdişê estbîyayîşê kurdan neyêno manayê awankerdişê mîmarîyê ci. Mîmarîye bê qanûn û bê prensîb nêbena. Rast nîyo merdim bi çend heb qanûnanê cezayî mesela biresnê uca. Unsurê esasî yê na mîmarîye, yanî prensîbê bingehin ê entegrasyonî beyannameyê 27ê sibate de est ê. No programêko sîyasî yo.”
