Aktîvîsta TJA’yî Yildiz Çetîn bale ant muhîmîya 8ê Adare ser o û veng da cinîyanê Wanî û vat: “Bêrê ma vera zîhnîyetê patrîarkalî veng, reng, tîlîlî û yewîya xo biresnê yewbînan û 8ê Adare pîroz bikerê.”
8ê Adare sey Roja Cinîyan a Dinya yena zanayene. 8ê Adare tena rojêka pîrozbayî nîya eynê wextî de rojêka çalakî û hişyarî ya ke heqê cinîyan, tedaya vera cinîyan û têduştîya aborî yena munaqeşakerdene. Bi munasebetê 8ê Adare, Aktîvîsta TJA’yî ya Wanî Yildiz Çetîn derheqê kar û xebatan de ajansê ma rê qisey kerd.
‘Cinîya kurde bi têkoşîn û xoverdayîşê xo ewro heme dinya de yena şinasnayene’
Yildiz Çetîn derheqê xebatanê xo yê 8ê Adare de nê çîyî vatê: “Ma do ewro ra pey dest bi xebatanê xo bikerê. Verî cinîya kurde nêameyêne şinasnayene, la ewro bi têkoşîn û xoverdayîşê xo heme dinya de yena şinasnayene. Bi serran o seba azadîya xo û komelê xo pêşengîye kena. Eke cinî azade ba komel zî azad beno.”
‘Hêzê Cinîyanê kurd Rojavayê Kurdîstanî de hîna zaf ame vînayene’
Yildiz Çetîn dîyar kerd ke cinîyanê kurd her çar hetanê Kurdîstanî de yewîya xo awan kerda û wina vat: “Bi serran o Rojavayê Kurdîstanî de şerêk est bi û hema zî est o. Nê şerî de cinî û dayîkanê kurd bi têkoşînê xo yê hemverê DAIŞ’î dinya de gulbang da. Şexsê Rojavayê Kurdîstanî de hêzê cinîyanê kurd hîna zaf ame vînayene. Çeteyan waşt bi qesnayîşê gêsa ma mesajêk bidê la o kerdişê înan şexsê cinîya kurd de yewîya heme cinîyanê kurd awan kerd.”
‘Her roje bi destê camêrdan Gulîstan, Rojîn û Narînê ma yenê kiştene’
Yildiz Çetîn bal ant kiştişanê cinîyan ser o û qiseykerdişê xo wina qedêna: “Vakurê Kurdîstan û Tirkîya de her roje bi destê camêrdan Gulîstan, Rojîn û Narînê ma yenê kiştene. Labelê derheqê nê kiştoxan de çîyêk nêyeno kerdene. Ma emserr reyna qadan de yê. Ma do bi veng, reng û tîlîlîyanê xo 8ê Adare pîroz bikerê. Ewro ra pey heta 8ê Adare ma do bi heme xebatanê xo her qadêkê Wanî de bibê vengê cinîyan. Bêrê ma veng, reng û tîlîlî û yewîya xo biresnê yewbînan û 8ê Adare pîroz bikerê. 8ê Adare heme cinîyanê Wan û cinîyanê dinya rê pîroz bo. Jin jîyan azadî.”
