Pêvînayîşê Amerîka û Îranî yê nukleerî qedîyayê. Badê qedênayîşê dîyalogê hîrêyîne yê mabênê Amerîka û Îranî de ameyê kerdene her di hetan eşkera kerd ke do pêvînayîşî dewam bikerê.
Wezîrê Karanê Teberî yê Îranî serê babete de eşkerayî da ajansê Îranî. Temsîlkarê Amerîkayî zî rasterast eşkerayî nêda. La rayedaranê ke nameyê xo eşkera nêkerdê serê pêvînayîşê hetan de agahî da çapemenî. Gorê agahîyanê ke ameyê parekerdene de yeno vatene ke pêvînayîşî baş derbas bîyê û do pêvînayîşî Vîyana de dewam bikerê.
Wezîrê Karanê Teberî yê Îranî Abbas Arakçi derheqê eşkerayîya çapemenî de dîyar kerd ke serê hinî babetan de resayê tayê netîceyan. Goreyê eşkerayîya Arakçi qerar ame dayene ke ekîbê teknîkî do roja dişeme Vîyana de dest bi xebatanê teknîkî bikerê heta ke biresê çarçewe û pêşnîyaznameyêke.
Beşêka bînê yê eşkerayîya xo de, Arakçi behsê wedaritena ambargoyî kerd û vat: “Ma waştenê xo yê derheqê wedaritişê ambargoyî de bi zelalî ardî ziwan. Sewbîna zî çîyê ke ma wazenê bi ca bêrê zî ma munaqeşe kerd.”
Arakçî dîyar kerd ke kombîyayîşê teknîkî do rojo dişeme Ajansê Enerjîya Atomî yê Mîyanneteweyî de dest pêbikerê. Ame dîyar kerdene ke pêvînayîşê çarine de do hewteyê vêrnîya ma de virazîyo.
