Rêberê PKKê Abdullah Ocalan di nirxandinên xwe yên berê de têkildarî azadiya jinan wiha gotibû: “Pêwistiya civaka demokratîk bi hişmendiya jinê û vîna jinê ya azad heye. Hewceye mirov her tim li ser bingehê azadiyê nêzîkî jinê bibe.”
Rêberê PKKê Abdullah Ocalan di nirxandinên xwe de diyar dike ku pêwîst e şoreşa jinê di qada civakî de were meşandin. Şoreşa jinê him di warê fikrî him jî di warê pratîkê de pêngavên bingehîn dixwaze. Abdullah Ocalan dibêje: “Di destpêkê de li dijî bîrdoziya zayendperest şerekî domdar hewce ye. Pêwîst e li hember hişmendiya tecawizkar a ku rojê 24 saetan di dewrê de ye jî şer di warê exlaqî û polîtîk de bê kûrkirin. Pêwist e ji bo armancên desthilatdarî û mijokdariyê zarok çêkirin neyê qebûlkirin were mehkûmkirin. Divê biryara zarok çêkirinê bi temamî ji jina ku azad bûye re bê hiştin. Divê bîrdoziya xanedaniyê û malbatê bê derbaskirin. Ya herî girîng jî divê felsefeya bi jinê re jiyînê, ya rast bêfelsefetî were derbaskirin. Pêwîst e hêza bi jinê re jiyînê di feraseta xwedî zarok bûyînê û pêkanîna têkiliya zayendî de neyê dîtin. Hêza bi jinê re jiyînê di dostaniyê, hevaltiyê, wek têkiliya civakî afirandina xweşikî, dilsozî, aştî, zadeganî; bi awayekî wekhev û azad parvekirinê de bê dîtin.”
‘Evîneke rasteqîn encax di hevsengiya hêza heqîqeta civakî de pêkan e’
Abdullah Ocalan di nirxandinên xwe de balê dikişîne ser eşqê û şoreşa jinê û wiha dibêje: “Evîneke rasteqîn encax di hevsengiya hêza heqîqeta civakî de pêkan e. Ne gengaz e ku di kesayetên ku bi koletiyê, destdirêjiyê û desthilatdariyê re têkildarin de eşq pêk were. Bi hezaran ceribandinên serneketî û têkçûnên malbatan vê rastiyê pişterast dikin. Dema ku herî kêm qasî mêr jin jî bibe xwediyê hêza civakî û zanebûnê wê demê pêkan e ku evîn û xweşikî; ji desthilatdariyê dûr, di nav aştî û wekheviyê de bi awayekî azad bê afirndin û parvekirin. Sedsala 21emîn şoreşa jinê ferz dike. Dirûşmeya ‘Ya jiyan ya barbartî’ vê şoreşê dispire.”
‘Modernîteya Demokratîk serdema şoreşa jinê ye’
Rêberê PKKê Abdullah Ocalan desnîşan kiribû ku Modernîteya Demokratîk di mijara pirsgirêka jinê û şoreşa jinê de perspektîf û rolên pêşengtiyê pêşkêş dike û wiha gotibû: “Aborî pîşeya jinê ya cewherî ya civakî ye, karê wê ye. Ekolojî encax bi hestiyariya jinê dikare bi civakê re bibe yek. Jin wek nasname ekolojîst e. Pêwistiya civaka demokratîk bi hişmendiya jinê û vîna jinê ya azad heye. Modernîteya Demokratîk serdema şoreş û şaristaniya jinê ye.”
Azadiya jinê
Abdullah Ocalan diyar kiribû ku hewceye mirov her tim li ser bingehê azadiyê nêzîkî jinê bibe û azadî jî rewşeke zîhnî û ruhî ye û di vê mijarê de jî wiha dibêje: “Nêzîkatiya min li hember jinê bi temamî li ser bingeha azadiyê ye. Ev nîzîkatiya min ji bo gel jî, ji bo jinê jî heta ji bo mêran jî wisa ye. Pêwîst e mirov xwe baş nas bike û bide nasîn. Azadî nebe nabe, ev mijareke ku nayê nîqaşkirinê lê azadî mijareke zîhnî û ruhî ye. Pêwîst e mirov bi hestên xwe, xwe binase, li ser fikrên xwe serwer be û bizanibe dixwaze çi bijî. Azadî ev e. Min ji jinan re her tim ev tişt digotin. Ji bo wê heke behsa azadiya jinê dikin, bila li ser van esasan nêzî min bibin, heke dê ji min hez bikin bila wiha hez bikin, nexwê bila vala vala xwe newestînin. Heke dê werin bila li ser vê bingehê werin. Ez bi jinê re her tim li ser bingehê azadiyê dijîm û ez ê wisa bijîm.”
