Amedsporê kongreya xwe ya awarte li dar xist û serok û rêveberiya nû hilbijart. Nahît Eren ji bo serokatiya Amedsporê hate hilbijartin.
Amedspor kongreya xwe ya awarte li dar xist. Ev kongreya 9emîn a Amedsporê yê tê birêvebirin. Kongre li Eywana Civînê ya ÇandAmedê pêk hat. Hevşaredara Bajarê Mezin a Amedê Serra Bucak, hevşaredarên navçeyên navendî yên Amedê, nûnerên rêxistinên sivîl ên Amedê, komên alîgirên Amedsporê û gelek kes tev li kongreyê bûn.
Axaftina destpêkê ya kongreyê rêveberê Amedsporê Cemal Dogrûl kir û bixêrhatina beşdaran kir.
Piştre dîwan hate hilbijartin û rêz hate girtin. Endamên dîwanê axivîn û paşê jî srêveberê Amedsporê Faruk Korkmaz rapora faliyetê ya serdemê xwend. Her wiha rapora malî ango lêçûyînan û rapora kontrolê hatin xwendin.
‘Amedspor remza berxwedanê ye’
Beşdarên kongreyê axivîn û bal kişandin ser girîngiya tîma Amedsporê û destnîşan kirin ku Amedspor nasname ye û xwedî mîsyonek girîng e. Berdevkên komên alîgiran jî axivîn û bal kişandin ser girîngiya alîgiran a ji bo Amedsporê û destnîşan kirin ku Amedspor sembola berxwedanê ye û gotin Amedspor navê yekîtî û têkoşînê ye.
Hevşaredara Amedê Serra Bucak jî axivî û ewilî bal kişand ser pêvajoya “Aştî û Civaka Demokratîk” û anî ziman ku ew di serdemek dîrokî de derbas dibin. Bucak da zanîn ku tevgera azadiyê ya gelê Kurd ji bo azadî, aştî û demokrasiyê barek giran daye ser milê xwe û ew bi hêvîdar in ku dê pêvajo bi awayekî serkeftî bigihîje qonaxa dawî. Bucak destnîşan kir ku ew ê her piştgiriya Amedsporê bikin û serkeftin ji Amedsporê û rêveberiyê re xwest.
Hilbijartin bi yek lîsteyê pêk hat û Serokê Baroya Amedsporê Nahît Eren ji bo serokatiya kuluba Amedsporê hate bijartin.
Endamên Desteya Rêveberiya Esîl a Amedsporê ev in:
Şeyda Arslantaş, Erdal Avşar, Şengul Saruhanoglû, Vecdî Erbey, Emel İzgi Demîr, Servet Vural, Dîlan Yumlu, Kamûran Azîzoglû, Laleş Ertugrul Uysal, Nîmet Taş, Semra Arslan, Abdulmutatalîp Sumbul, Nedîp Şîmşek, Nedîm Dalga, Nîhat Salmiş, Mursel Ekîcî, Serhat Demîr, Nevzat Gunay, Umut Gunel, Adnan Zengîn.
