Berdevka DEM Partiyê Ayşegul Dogan li Qoserê di hevdîtina gel de axivî û got divê şert û mercên Abdullah Ocalan bên başkirin.
Rêxistina DEM Partiyê ya Mêrdînê, di çarçoveya Pêvajoya Aştî û Civaka Demokratîk de li navçeya Qoserê ya Mêrdînê bi gel re civiya. Hevdîtin, bi deqeyek rêzgirtinê dest pê kir. Pişt re jî Berdevka DEM Partiyê Ayşegul Dogan axivî û banga Rêberê Gelê Kurd Abdullah Ocalan a 27ê Sibatê bi bîr xist.
Ayşegul Doganê got: “Em di pêvajoyeke dîrokî de ne. Ji salên 90î heta niha bi milyonan kes mexdûr bûn, me gelek kes winda kirin. Lê dîsa jî me li ber xwe da. Me jî xwest mîna hemû gelan bi nasname, ziman û çanda xwe bijîn. Heke ev daxwazên me hatibûna qebûlkirin me yê ewqas êş nekişanda. Em li ser xaka xwe bûn penaber.”
Ayşegul Doganê diyar kir ku êdî kesek nikare hebûna gelê Kurd înkar bike û got: “Rê û rêbazên têkoşîna me diguherin. Amûra me ya herî girîng a têkoşîna serdema nû, siyaseta demokratîk e. Daxwaza me ew e ku em bikaribin siyaseta demokratîk bikin, mafê me yê siyasetê were naskirin û daxwaza civakeke demokratîk û azad dikin.”
Ayşegul Doganê, got ku ew di pêvajoya destpêkeke nû de ne û axaftina xwe wiha qedand: “Hinek derdor hewl didin pêvajoyê bi dawî bikin. Hejmara wan zêde nîn e lê li valahiyê digerin. Em ê destûrê nedin van derdoran. Divê em bizanin ku Birêz Abdullah Ocalan bangeke stratejîk kir. Biryara PKKê stratejîk e. Dê vê hefteyê hevdîtineke nû li Îmraliyê were kirin. Divê komîsyona li Meclisê hatiye avakirin bi Birêz Abdullah Ocalan re hevdîtinê bike. Her wiha divê şert û mercên birêz Ocalan bên başkirin.”
