Platforma Yekîtiya Gel (CUP) a li Katalonyayê daxuyand ku ji welatên Katalan bigire heta Rojava: Emperyalîzmê têk bibin, mafê gelan yê xwebiryardana çarenûsê biparêzin! Her wiha Partiya Sosyalîst a Hindistanê jî diyar kir ku hêzên Rojavayî Kurd bi tenê hiştine û banga piştevaniya navneteweyî hat kirin.
Platforma Yekîtiya Gel (Candidatura d’Unitat Popula) ku li Katalonyayê xebatê dimeşîne, der barê êrîşên li ser Rojava de daxuyaniyeke nivîskî da. Di daxuyaniyê de hat destnîşankirin ku li Sûriyeyê rêveberiya Colanî ku wekî “hikûmeta demkî” tê binavkirin, piştî êrîşên paqijkirina etnîkî yên li ser Durziyan, êrişeke çekdarî li dijî Rêveberiya Xweser a Demokratîk a Bakur û Rojhilatê Sûriyeyê daye destpêkirin.
CUP bi bîr xist ku gelê Kurd ji bo têkbirina DAIŞê têkoşiya û bi hezaran şehîd da ku mirovahiyê ji barbariya cîhadî rizgar bike û wiha hate gotin, “Lê belê Yekîtiya Ewropayê û dewletên Spanya û Fransayê ne tenê bêdeng man, her wiha piştgiriya siyasî û aborî didin hikumeta Colanî. Divê em hêzên ku ji berjewendiyên jeopolîtîk ên hêzên biyanî û paşverû dûr in, rêz li cudahiya etnîkî û olî ya herêmê digirin û ber bi çareseriyên demokratîk ên rastîn ve diçin biparêzin. Ji Welatên Katalan bigire heta Rojava: Emperyalîzmê têk bibin, mafê gelan yê xwebiryardana çarenûsê biparêzin!”
Ji Partiya Sosyalîst a Hindistanê piştgiriya ji bo Rojava
Komîteya Têkiliyên Derve ya Partiya Sosyalîst a Hindistanê têkildarî êrişên li ser Rojavayê daxuyaniyek weşand. Di daxuyaniyê de hat diyarkirin ku Kurd, wekî gelê ku li welatên cuda yên mîna Îran, Azerbaycan-Ermenistan, Sûriye, Iraq û Tirkiyeyê belav bûne, bi zext û pevçûnan re rû bi rû ne; tevî vê yekê dîrok, çand û lêgerîna azadiyê ya hevpar Kurdan li gel hev digire.
Di daxyaniyê de hate destnîşankirin ku ew bi têkoşîna gelê Kurd re di nav piştgiriyê de ne û bal kişand ser pêwîstiya helwesteke gerdûnî û biperensîp a li dijî polîtîkayên durû yên Rojavayê. Daxuyani bi banga piştgiriya têkoşîna azadî û diyarkirina çarenûsa gelê Kurd bi dawî bû.
