Dêrsim – Parlamentera DEM Pariyê ya Dêrsimê Ayten Kordû bertek nîşanî girtina Hevşaredara Dêrsimê Bîrsen Orhan da û wiha got: “Em van polîtîkayên li dijî tekoşîna xwe ya jinê qebûl nakin. Dê têkoşîna wekhevî û azadiyê bidome.”
Wezîrê Karên Hundir ê Tirkiyeyê di 25’ê Mijdarê de qeyûm tayînî Şaredariya Dêrsimê kir. Piştî tayînkirina qeyûman çalakiyên li dijî qeyûm didomin. Di vê pêvajoya çalakiyan de 9 kes hatin girtin. Yek ji kesên hatin girtin Hevşaredara Dêrsimê Bîrsen Orhan a ku qeyûm tayînî şûna wê kirin e. Bîrsen Orhan ewil di 24ê Mijdarê de hatibû binçavkirin. Dadgehê der barê wê de biryara cezayê hepsa malê dabû. Lê di 30’ê Mijdarê de Bîrsen Orhan dîsa li malê binçav kirin û vê carê biryara gritina girtîgehê dan û şandin girtîgehê.
Parlamentera DEM Partiyê Ayten Kordu ji nûçegîhana JINNEWSê Gulistan Gulmuş re axivî. Ayten Kordu, têkildarî pêvajoya qeyûm û girtina Hevşaredar Bîrsen Orhan nirxandin kir û got: “Ne cara yekemîne ku qeyûm tayînî Dêrimê dikin. Piştî Mêrdîn, Êlihê û Xelfetiyê vê carê qeyûm tayînî şaredariya Dêrsim û navçeya wê Pilûrê kirin. Polîtîkayên mêtingeriyê li vî welatî bûne nîşana bêhiqûqiyê. Em behsa hikûmetek û zîhniyeteke desthilatdar dikin ku derbeke wiha eşkere li butçe, xizmetguzarî, şêwaza jiyanê û çareseriya pirsgirêkên gel dixe.”
Dijminê Elewî jin û zarokan in
Ayten Kordu, diyar kir ku hikûmetê li gorî pergala xwe daraz ava kiriye û wiha got: “Polîtîkayên qeyûman bi tayînkirina qeyûm li Şaredariya Mîksê dewam dikin. Ji me re dibêjin, ‘Hûn nikarin xwe bi rêve bibin, hûn nikarin biryarên xwe bidin, hûn nikarin hilbijêrin. Li vî welatî li hemberî hemû hêzên aştiyê di serî de jinan hovîtîya zext û girtinan hatiye destpêkirin. Di doza ku duh li Enqereyê dest pê kir û tevahiya şevê dewam kir de gelek aktîvîst, siyasetmedar û femînîst hatin girtin. Ev ne tenê ji bo Kurd û Elewiyan pirsgirêka hemû gelan e. Ev qeyûm ji bo hemû gelan hatiye tayînkirin. Siyaseta dijminane heye. Dijminê jin, Elewî û zarokan e. Li qirkirina jin û zarokan binêrin. Li jinên ku her roj tên qetilkirin binêrin. Ez meraq dikim gelo vê bêhiqûqiyê li hemberî kujerên jin û zarokan jî dikin.”
‘Em serî natewînin’
Ayten Kordu, diyar kir ku girtina Bîrsen Orhan berteka li dijî berxwedana gel e û wiha got: “Li vî welatî kesên ku demokrasiyê dixwazin hene. Dixwazin bi awayekî însanî bijîn, têkoşîna jinan pêş bixin, dixwazin têkoşîna jinê, ziman û çanda xwe pêş bixin. Bila baş bê zanîn ku li ser van axan gelek zilm, binçavkirin û girtin hatine kirin. Gelê me yê Dêrsimê serî netewand. Em ê li dijî êrîşên li ser têkoşîna jinê û li dijî têkoşîna xwe ya giştî serî netewînin.”
