Serokê PDKê Mesûd Barzanî bi peyamekê piştgirî da peyama Rêberê PKKê Abdullah Ocalan û got: “Hêvî dikin ku peyama Birêz Ocalan bingeha jinûve destpêkirina pêvajoya aştiyê ava bike.” Qubad Talebanî jî got: “Abdullah Ocalan careke din deriyê çareseriyê vekir.”
Serokê Partiya Demokratîk a Kurdistanê (PDK) Mesûd Barzanî piştî peyama dîrokî ya Rêberê PKKê Abdullah Ocalan ji aliyê şandeya DEM Partî ve li Stenbolê hate parve kirin, peyamek da û piştgiriya xwe ya ji bo pêvajoyê nîşan da.
Peyama Mesûd Barzanî wiha ye: “Helwesta me ya di derbarê pêvajoya aştî û çareseriyê ya li Tirkiye nehatiye guherîn, bi hemû hewl û derfetên xwe em piştgiriya vê pêvajoya aştiyê ya li Tirkiye dikin. Aştî yekane rêya rast a çareserkirina pirsgirêkan e. Hêvîdarin ku peyama Birêz Ocalan ji bo pêvajoya aştiyê pêk were bibe destpêkek. Peyam bigihêje encamekê ku berjewendiyê her kesê têde hebe.”
Qubat Talabanî: Birêz Ocalan careke din deriyê çareseriyê vekir
Cigirê Serokê Hikûmeta Dem Borî ya Herêma Kurdistanê Qubad Talebanî diyar kir ku Rêberê PKKê Abdullah Ocalan careke din deriyê çareseriya aştiyane û demokratîk vekir û xwest her kes ji bo serxistina pêvajoyê berpirsyariyên xwe bi cih bîne. Qubad Talebanî derbarê banga Rêberê PKKê Abdullah Ocalan de wiha got: “Gelê Kurd tim aştîxwaz bûye û weke rêya herî dawî ji bo parastina mafê xwe û hebûna xwe dest daye çekê. Birêz Abdullah Ocalan careke din deriyê aştî û çareseriyeke aştiyane û demokratîk ya pirsgirêka Kurd li Tirkiyeyê vekir. Dest bi qonaxeke nû ya têkoşîna siyasî ya Kurdan li Tirkiyeyê kir. Hêvîdarin û daxwaz dikin ku vê carê ev pêvajo bi encameke bi dil ji bo gelê Kurd û Tirkiye dawî bibe, li ser bingehê bi hev re bijîn. Erkê her kesê ye ku bi pêşwazî li peyama Birêz Ocalan bike û ji bo serxistina pêvajoyê hevkar bin.”
