Hevserokê Giştî yê DBPê Keskîn Bayindir di merasîm û şahiya vekirina avahiya nû ya DEM
Partiyê de axivî û diyar kir ku gelê Kurd li ber azadî û aştiyeke birûmet e û ji bo vê yekê jî xebat lazim e. Hevseroka DEM Partiyê Tulay Hatimogûllariyê jî bal kişand ser pêvajoyê û got provakatoran her der tije kiriye.
Rêxistina Partiya Wekhevî û Demokrasiyê ya Gelan (DEM Partî) ya Colemêrgê, bi boneya vekirina
avahiya xwe ya nû merasîmeke girseyî pêk anî û şahiyek li dar xist. Hevseroka Giştî ya DEM Partiyê
Tulay Hatîmogûllari û Hevserokê Giştî yê Partiya Herêmên Demokratîk (DBP) Keskîn Bayindir tev li
merasîma vekirinê û şahiyê bûn. Merasîm bi coşeke mezin dest pê kir û avahiya nû ya DEM Partiyê bi
çepik û tilîliyan hat vekirin. Parlementerên DEM Partiyê yê Colemêrgê Vezîr Coşkûn Parlak, Oznûr
Bartin û Onûr Duşunmez, Hevseroka Şaredariya Colemêrgê Viyan Tekçe ku qeyûm tayînî cihê wê
hatiye kirin, rêxistinên DEM Partî û DBPê yên navçeyên Gever, Şemzînan û Çelê, nûnerên saziyên sivîl
û gelek welatî tev li merasîma vekirinê bûn.
‘Ji bo pêşketina pêvajoyê xebat lazim e’
Piştî merasîma vekirinê girse derbasî cihê şahiyê bû. Bi hezaran welatî beriya şahiyê qad tijî kir û
govend gerand. Hevserokê Giştî yê DBPê Keskîn Bayindir li vir axivî û got ku îro roja Kobanê ye û ji
yên ku ala azadiyê bilind kirin re silav şand. Keskîn Bayindir anî ziman ku ew ji qontara Çiyayê Simbil
silavan ji bo Rêberê Gelê Kurd Abdullah Ocalan dişînin û got: “Birêz Ocalan digot; Rojekê ez
derbikevim ez ê berê xwe bidim Çiyayê Cîloyê û jiyaneke demokratîk ava bikim. Em li Colemêrgê û
welatê xwe rê nadin tiştên xerab û tiryakê. Divê em soz bidin ku em nahêlin şerê taybet bikeve di
nava kolanên me. Em ê welatê xwe li ser rihê welatparêziyê ava bikin. Malbat û eşîrên me gelek bi
qîmet in. Heke eşîrtî parastina nasname û çanda xwe û gelê xwe bike li ser çavên me. Lê niha hinek
kes bi taximên reş û tisbîhan xwe weke axa nîşan didin û ji xwe re dibêjin mezin. Mezinatî bi xwedî
derketina çand, gel û nasnameya xwe çêdibe. Colemêrg cihê Kurdewarî, welatparêziyê û neteweyiyê
ye. Em bi cil û bergên xwe Kurd in û li Kurdistanê ne. Rêber Ocalan pêvajoyek daye destpêkirin. Êdî
em li ber azadî û aştiyeke birûmet in. Lê ji bo vê yekê xebat lazim e.”
‘Provokatoran her der tijî kiriye’
Dû re Hevseroka Giştî ya DEM Partiyê Tulay Hatimogûllari axivî û wê jî Roja Kobanê ya Cîhanê pîroz
kir. Tulay Hatimogûllariyê anî ziman ku ew bi dilsoziyeke mezin hewl didin ji Banga Aştî û Civaka
Demokratîk re bibin bersiv û wiha got: “Weke hûn jî dizanîn di 27ê Sibatê de LRêzdar Abdullah Ocalan banga Aştî û Civaka Demokratîk kir û Tevgera Azadiya Kurdistanê jî bi gavên girîng bersiva vê bangê da. Di vê pêvajoyê de berbirsiyariyeke mezin dikeve ser milê hikûmet, muxalefet û herkesî û divê herkes peywira xwe bi cih bîne. Divê qanûnên entegrasyona demokratîk ku Birêz Ocalan jî behs dikir, qanûnên azadiyê û
qanûnên taybet bên derxistin. Pravakatoran her der tijî kiriye û divê em lez bikin. Garantiya vê
pêvajoyê gel û têkoşîna azadiyê ye û pûsûlaya me jî aştî ye. Gelî ciwanan, Birêz Ocalan ji bo we di
nava bendewariyeke mezin de ye. Divê ciwan xwedî li vê pêvajoyê derbikevin.”
Piştî axaftinan hunermend Xêro Abbas derket ser dikê bi stranên xwe qad coşand. Xêro Abbas jî bal
kişand ser pêvajoyê û got ku Kurdan ti carî dest ji daxwaza xwe ya aştiyê berneda.
Piştî konsera Xêro Abbas bername bi dawî bû.
