Şandeya Îmraliyê piştî hevdîtina xwe ya bi Serokê Herêma Kurdistanê Nêçîrvan Barzanî re daxuyaniyek kurt da. Hevserokê DBPê Keskîn Bayindir got: “Birêz Nêçîrvan Barzanî wê piştgiriyek mezin bide vê pêvajoyê.”
Şandeya Îmraliyê serdanên xwe yên bi rayedarên Başûrê Kurdistanê re didomîne. Şandeya Îmraliyê saet di 10:00an de bi Serokê Herêma Kurdistanê Nêçîrvan Barzanî re civiya. Civîna li ofîsa taybet a Nêçîrvan Barzanî pêk hat û civîn bi dawî bû.
Piştî civînê Hevserokê Giştî yê Partiya Herêmên Demokratîk (DBP) Keskîn Bayindir, derbarê hevdîtina bi Nêçîrvan Barzanî re daxuyaniyek kurt da.
Keskîn Bayindir wiha axivî: “Şandeya me bi rêzar serokê Herêma Kurdistanê Nêçîrvan Barzanî re hevdîtinek baş û dilxweş kir. Di hevdîtinê de, me silav û hezkirina birêz Ocalan gihandin Birêz Nêçîrvan Barzanî. Me peyamên birêz Ocalan yên ji bo aştî û çareseriyê pêşkêşî birêz Nêçîrvan Barzanî kir.
Gelê Kurd bi hêvî ye
Di hevdîtina me de, nêzîkatî û helwesta rêzdar Nêçîrvan Barzanî gelek baş bû, xwedî helwestek neteweyî bû. Ji ber vê heke pêvajoya li Bakurê Kurdistan û Tirkiyeyê li pêş bikeve, ji bo pêşeroja gelê Kurd wê gelek baş be. Hêviya gelê Kurd ji vê pêvajoyê heye. Helwesta hemû hizbên Kurd ewe ku ev pêvajoya çareseriyê pêş bikeve. Di hevdîtina me de rêzdar Nêçîrvan Barzanî jî wê ji bo pêşxistina vê pêvajoyê piştgiriyek mezin bide. Hemû rêxistin û serokên Kurdistanê xwedî helwest in û bawerin ku ev pêvajoya çareseriyê pêş bikeve.”
Şande dê derbasî Silêmaniyê bibe
Şandeya Îmraliyê hevdîtinên xwe yên li Hewlêrê bi dawî kir û wê derbasî bajarê Silêmaniyê bibe û bi Serokê YNKê Bafil Celal Talebanî û cîgirê serokê hikumeta Herêma Kurdistanê Qubat Talebanî re jî bicive.
