Mêrdîn – Berdevka DEM Partiyê Ayşegul Dogan ku li ser sînorê Qamişloyê axivî, bal kişand ser pêyamên Rêberê PKKê Abdullah Ocalan û wiha got: “Roj roja xwedî derketina ve îradeya ku em bi salan e li bendê ne. Divê em vê tecrîde bi temami rakin û destê birêz Ocalan û yê gel bigihînin hevdû.”
Li dijî êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê, li ser sînorê Nisêbîn a Mêrdînê û Qamişloyê çalakiya nobetê hatibû destpêkirin.
Îro bi tevlibûna Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari, Hevserokê Giştî yê Partiya Herêmên Demokratîk (DBP) û bi sedan kesan, bi şîara “Em gelên ji bo aştî, azadî û pêkvejiyanê li ber xwe didin silav dikin” ji Parka Barişê ber bi qada nobetê ya li ser sînorê Qamişloyê ve bi dirûşma “Bijî berxwedana Rojava” meş hate lidarxistin.
Girseya ku Berdevka DEM Partî Ayşegul Dogan û parlamenterên DEM Partiyê di nav de û ji sedan kesan pêkdihat, pankartên ku li ser, “Rojava rûmeta mirovahiyê ye, Rojava biparêze”, “Rojava rûmeta me ye” dinivisîn hilgirtin û heta Parka Barişê meşiyan. Di meşê de wêneyên rojnameger Cîhan Bîlgîn û Nazim Daştan ên hatin qetilkirin û dowîzên li ser, “Rojava hebûna me ye” û “Ji şer re na a niha aştî” dinivisî jî hatin hilgirtin. Girse li Parka Aştiyê heta ber sînor bi stran û dirûşmeyên, “Bijî berxwedana Rojava” , “Rojava rûmet e, rûmeta gelê Kurd e”, “Bijî Serok Apo” û “PKK gel e gel li vir e” meşiyan. Her wiha girseyê di meşê de sirûda Çerxa Şoreşê jî gotin.
‘Pêşiyê li komkujiya li dijî Elewiyan bigirin’
Li cihê nobetê ewilî Mela Seyda Babayê Xelatî axivî û bi lêv kir ku divê Kurd ji her çar aliyên Kurdistanê yekitiya xwe avabikin û got ku aştî bi yekitiyê çêdibe, ji ber wê yekitî emrê Xwedê ye. Hevserokê Komeleyên Elewiyên Demokratîk (DAD) Mûstafa Karabûdak jî bal kişand ser komkujiya li dijî Elewiyan li Suriyeyê û wiha got: “Li Suriyeyê bi destê DAIŞ û HTŞ a ku hezên hegemon û desthilata AKP pistgiriyê dide vê komkujiyî li dijî Alewiyan pêktê. Em bang li hemû dinyayê dikin ku berê xwe bidin Suriyeyê û pêşî li vê komkujiyê bigrin.”
‘Em xwîşk û biratiya bin xet û ser xet silav dikin’
Pişt re jî Berdevka DEM Partiyê Ayşegul Dogan axivî. Ayşegul Dogan bi gotina, “Em xwişk û biratiya bin xet û ser xetê silav dikin” dest bi axaftina xwe kir û wiha got: “Tirêjên Rojê ew dem ji bo me kir bihar. Ew bayê biharê ji Îmraliyê tê. Bi rojan e em li vir nobedê digirin. Em dibêjin em sînorên we di navbera me de çekirine di dilê me de nînin. Rojava aliyê me yê herî biçûk û nazik e. Lewma em Rojava xwedî dertên û sînoran nasnakin. Hûn nikarin bêjin xwişk û biratiya we ji bo ewlehiya Tirkiyeyê xetere ye. Em li vir careke din dibêjin nobeda me nobeda aştiyê ye. Nobeda me bangawaziya Demokrasiyê ye. Bangawaziya tifaqa Kurdan e. Em ji bo xwişk û biratiyeke serbilind û hevdû qebûl dike em amade ne. Em li vir careke din banga xwe bilind dikin. Careke din jî aliyê xwe yê herî nazik û delal re silav dişînin. Em dixwazin ziman, çand û hunera me bê naskirin. Divê ji bo wê jî em têkoşîna xwe mezin bikin. Rojnamegerên weke we ku li du rastiye bûn Cîhan Bîlgîn û Nazim Daştan hatin hedef girtin. Bi hedefgirtina rojnamegeran xwişk û biratî nabe.”
‘Destê xwişk û biratiyê dirêjî Rojava bikin’
Di berdewama axaftina xwe de Ayşegul Dogan bal kişand ser peyamên Rêberê PKKê Abdullah Ocalan û axaftina xwe wiha bi dawî kir: “Rêzdar Ocalan di bin tecrideke mezin de rêya aştiyê weke neqseke zirav û kûr anî ve merheleyê. Ew îradeya xwişk û biratiyê ku wî derxist holê em hemû bendawerê wê ne. Ew ax jî têr bûye û dilê me jî êdî raneke. Wext ew e ku deriyên zindanan vebibin. Asta ku em gihiştinê bi têkoşîna me derketiye hole. Lewma roj roja xwedî derketina ve îradeya ku em bi salan e li bendê ne. Divê em vê tecrîdê bi temami rakin û destê birêz Ocalan û yê gel bigihînin hevdû. Divê destkeftiyên Kurdan weke xetere neyên dîtin û weke destkeftiya xwişk û biratiyê bên dîtin. Destê ku dirêjî me dikin bila dirêjî Rojava jî bikin û di navbera gelê Kurd û Tirk de biratiyeke ebedî ava bibe.”
Daxuyanî bi rêzgirtina ji bo rojnameger Cîhan Bîlgîn û Nazim Daştan ên di encama êrişa SÎHAyê de jiyana xwe ji dest dan hate girtin bi dawî bû.
