Berdevka DEM Partiyê Ayşegul Dogan diyar kir ku Rêberê Gelê Kurd Abdullah Ocalan deriyekê ji wan re vekiriye û got: “Ev derî deriyekê dîrokî ye. Birêz Abdullah Ocalan xîretekê mezin daniye holê û divê em xwedî li vê xîretê derkevin.”
Rêxistina DEM Partiyê ya Navçeya Esenyurtê ya Stenbolê kongreya xwe ya asayî ya 3yemin li dar xist. Kongre li Eywana Dawetê ya Boyê pêk hat. Berdevka DEM Partiyê Ayşegul Dogan, Hevserokên DEM Partiyê yên Stenbolê, Şaredarê Esenyurtê Ahmet Ozerê ku qeyum li şûna vî hatibû tayînkirin, rêveberên DEM Partiyê yên navçeyên Stenbolê û gelek welatî tev li kongreyê bûn. Di eywana kongreyê de pankartên, “Jin Jiyan Azadî” û “Aştî bi azadiya fizikî ya Serokatî re pêkan e” hatin daliqandin.
Kongre bi hilbijartina dîwanê destpê kir û Cesîm Çîçek, Sînem Koyun, Kerem Kartal, Feyaz Kurt, Cîhan Şahkoç, Fatîh Çinar û Selma Yilmaz ji bo dîwanê hatin hilbijartin. Paşê jî ji bo cangoriyên di têkoşîna azadî û demokrasiyê de jiyana xwe ji dest dane deqîqeyeke rêz hate girtin. Hevserokên DEM Partiyê yên Rêxistina Esenyûrdê Cesîm Çîçek û Hanim Kayiş gel silav kirin.
‘Ocalan li dijî taritiyê ronahî parast’
Paşê jî Hevseroka DEM Partiyê ya Stenbolê Arîfe Çinar axivî û destnîşan kir ku piştî 6ê Çileyê gelê Kurd ji bo fikra DAIŞ û HTŞê sernekeve li berxwe da û wiha got: “Îro li tevahî cîhanê sîstemekê tarî heye lê birêz Abdullah Ocalan di 27ê Sibata 2025an de banga ‘Aştî û Civaka Demokratîk’ kir û li dijî taritiyê ronahî parast.”
‘Ji ber ku Ahmet Ozer Kurd bû qeyûm tayînkirin’
Paşê Berdevka DEM Partiyê Ayşegul Dogan axivî û diyar kir ku di serî de qeyûm tayini Colemergê kirin û wiha axivî: “Paşê me ji civakê re got heke dîsa gelê Kurd tenê bimîne dê qeyûm tayinî Stenbolê bikin. Piştî 6 mehan qeyûm tayinî Esenyurtê kirin, ji ber ku Ahmet Ozer Kurd bû ev gav hat avêtin. Bi vê xwestin peyam bidin gelê Kurd. Ev peyam dê sibe ji bo gelek din jî pêk were. Divê ev peyam baş be fêmkirin û her kes li dijî neheqiyê bisekine.”
‘Aqûbeta Rojava aqûbeta gelê Kurd e’
Ayşegul Dogan anî ziman ku berxwedana Rojava ji bo gelê Kurd û gelên ku nasnameya wan hatine qedexekirin gelek girîng e û wiha domand: “Rojava ne tenê herêmek e. Em dizanin ku aqûbeta Rojava aqûbeta gelê Kurd e. Ji bo wê em dibêjin dorpeçkirina Rojava dorpeçkirina siyaseta demokratîk e. Dema em dibêjin Rojava kuştin û qîrkirin tê hişê me. Em dibêjin êdî van tiştan qebûl nakin.”
‘Birêz Abdullah Ocalan deriyek ji me re vekiriye’
Di dawiya axaftina xwe de Ayşegul Dogan silav li Îmraliyê ji Rêberê gelê Kurd re şand û axaftina xwe wiha bi dawî kir: “Birêz Abdullah Ocalan deriyek ji me re vekiriye. Deriyê ku ji me re vekiriye deriyek dîrokî ye. Ev derî di serî de ji bo gelê Kurd û ji bo gelên Rojhilata Navîn ku bikaribin bêşer û bi rûmet bi hev re azad bijîn, hatiye vekirin. Birêz Abdulah Ocalan ev 40 sal e ked dide. Birêz Abdullah Ocalan xîretek mezin daniye holê divê em xwedî li vê xîretê derkevin.”
Piştî axaftinan hilbijartin pêk hat û Antîke Tarhan û Serkan Yilmaz bûn Hevserokên Rêxistina DEM Partiyê ya Esenyurtê.
