MEBYA-DERê di 33emîn salvegera Gulnaz Karataş (Bêrîtan Hêvî) de li avahiya xwe bernameya bibîranînê pêk anî.
Şaxa Komeleya Piştgirî û Yekîtiyê ya ji bo Kesên ku Xizmên xwe li Dergûşa Şaristaniyê Windakirine (MEBYA-DER) a Amedê li avahiya xwe bernameya bîranîna Bêrîtan Hêvî li dar xist. MEBYA-DERê ji bo bîranîna Gulnaz Karataş (Bêrîtan Hêvî) ku di 25ê Cotmeha 1992an de li dijî şerê hevkariya PDK û YNKê ya bi artêşa tirk re çalakî pêk anîbû, bi tevlêbûna nûnerên partî û saziyên civakî bername amade kir. Parlamenterê DEM Partiyê, Hevserokên DEM Partiyê yên Amedê endamên meclisa Şaredariya Peyasê, nûnerên Dayîkên Aştiyê beşdarî bernameyê bûn.
Bîranîn bi rêzgirtinê dest pê kir. Piştî rêzgirtinê sînevîzyona der barê Bêrîtan de hatibû amadekirin hat pêşandan. Kesên beşdarî bernameyê bûn diruşmeyên ” Şehîd namirin” û “Bijî Serok Apo” berzkirin.
‘Navê zarokên xwe datînin Berîtan’
Hevseroka MEBYA-DERê Gûrbet Sevîktek di bernameya bîranînê de axivî û got: “Bêrîtan ji bo hemû jinên Kurd bûye sembol. Beriya 33 salan heval Bêrîtan bi sekna xwe ji bo hemû jin, ciwan û zarokan bû peyamek û ji dijmin re jî bû bersivek. 33 sal beriya niha gelek jinên ku ji aliyê pergala mêrsalariyê ve dihatin tepisandin, bi çalakiya Bêrîtan re ketin ferqa nasnameya xwe. Ji wê demê heta îro zarokên keç ên ku ji dayik dibin navê wan dikin Bêrîtan. Heval Bêrîtan ji bo hemû jinan bû mîrasek mayînde. Divê em jî rêya têkoşînê mezin bikin.”
Bername bi tilîlî û bi çepikan qediya.
