Xwepêşandanên li Îran û Rojhilatê Kurdistanê di roja 12emîn de berdewamin. Hêzên rejîmê bi girtin û kuştinê hewl dide dawî li xwepêşandanan bîne. Hat ragihandin ku di nava 12 rojan de 2 hezar û 217 kes hatine binçavkirin, herî kêm 34 xwepêşander hatine qetilkirin ku 5 ji wan zarokin.
Xwepêşandanên ku ji 28ê Kanûna 2025an ve li seranserî Îran û Rojhilatê Kurdistanê li dijî qeyrana aborî, pirsgirêkên siyasî û civakî destpêkirine, dewam dikin. Tevî ku rejîma Îranê bi tûndtirîn şêwaz rûbirûyê xwepêşandanan dibe, lê her ku diçe xwepêşandan berfirehtir dibin.
Hêzên rejîmê êrişî ser xwepêşandanan dikin
Li gor dîmenên ku li ser torên medya dijîtal hatine parvekirin, di roja 12emîn a xwepêşandanan de jî hêzên rejîmê bi şêwazek tûnd êrişî ser xwepêşandanan dike. Kesên ku di xwepêşandanan de birîndar dibin, ji tirsa ku ewê li nexweşxaneyan werin binçavkirin, nikarin serî li nexweşxaneyan bidin.
Her ku diçe xwepêşandan berfireh dibin
Xwepêşandana gelên Îranê li 348 navçe, 111 bajarok û 31 parêzgehên Rojhilatê Kurdistan û Îranê belav bûne. Heta niha 45 zanîngeh ji bo piştgiriyê tevlî xwepêşandan bûne.
Li gor agahiyan li hin bajarên Rojhilatê Kurdistan û Îranê, gelek ji hêzên ewlehiyê û Supayê Pasdaran ji bajar hatine derxistin, dikan û cihên giştî girtîne.
2 hezar 217 kes hatine binçavkirin
Li aliyê din li gor amarên Rêxistina Mafên Mirov ya HRANAyê, di 12 rojên xwepêşandanê de 2 hezar û 217 kes hatine binçavkirin, herî kêm 34 xwepêşander hatine qetilkirin, 5 ji wan zarokin û bi dehan xwepêşander jî birîndar bûne.
Hêzên rejîma Îranê bi darê zarê bêy amadebûna parêzeran, îfadeyên xwepêşanderên hatine binçavkirin digrin û li ser medyaya fermî ya Îranê di weşînin.
