Hemsereka Pêroyî ya DBP’î Çîgdem Kiliçgun Uçar dîyar kerd ke Îmralî de rejîmê tecrîdî est o û wina vat: “Binê nê tecrîdî de serekê Kurdan birêz Ocalan seba aşîtî seba azadî seba çareserî zaf çî vatî. No vatenê xo no fikre xo seba xelesîyayîşê heme şarê Rojhilata Mîyanene yo.”
Bi rayberîya Platformê Sazîyanê Demokratîke Amed ra Enqereyî meşê “Çareserîya Demokratîk û Meşo Azadî” yena kerdiş. Beşdaran ra yew zî meşî Hemsereka Pêroyî ya DBPî Çîgdem Kiliçgun Uçar a.
Hemsereka Pêroyî ya DBPî Çîgdem Kiliçgun Uçar seba armancê meşî vat ke 14ê Gaxane de rewşenbîr û nîviskaranê Tirkîya eşkerayîye viraşt, persa esasîye zerê Tirkîya de persa Kurmancî yo û ê wazenî ke naye ra tepîya seba persa Kurmancî nê çareserîya Kurmancî qesî bikîrê, coka yew eşkerayîye viraşte û wina vat: “Ma kî Kurdîstan ra veng da rewşenbîr û nîvîskaran. Ma va ke: Şima çîyêde henên vat şima no bar girewt serê xo ma kî jû rayîraşîyayîş kenîme. Amed ra vejîyayîme raye ra peydana şîme Riha îca ra ameyîme Dîlok meşte kî Edene Mersîn peynîye de şonîme Enqere.”
Polîtîkayê dewlete netewî çareser nêbî
Çîgdem Kiliçgun Uçar wina domna: “Çîk o derdê ma? Ma wazenîme ke zerê na seserrî de polîtîkayê dewlete netewî çîyê çareser nêbî. Naye ra tepîya hem komelê Tirkîya hem nîviskar û rewşenbîrê Tirkîya hem kî partîyê sîyasî naye ra tepîya persa Kurmanc nê çareserîya Kurmanc qesî bikerê. No bar barê pêroyê şaranê Tirkîya, pêro partîyanê Tirkîya yo. Jû çîyode bîn est o, o zî Rojhilata Mîyanêne de Şerê Dinya ê Hîreyîne est o. No Şerê Dinya ê Hîreyîne serê çiyî yenê viraştene? Serê hîrê çîyan yeno viraşteyene. Jûye polîtîkayê enerjî ser, jûya bîne îdarekerdena şaran, jûye zî şerê hegemonya est o.”
Seba haştîye qesî bikerê
Çîgdem Kiliçgun Uçar bal ant ser muhîmîya haştîye û rewşa Rojawanî wina dewam kerd: “Rojhilata Mîyanêne de dewletê serdestî wazenê ke dîzaynêde newe bikerê. Ama uza de çîyede giran çîyêde roştî est o. O çîyo roştî Rojawan o. Uza de jû idareyo xoser ame viraştene. Uza de her şar, înan ebe goreyê xo şikîno weşîya xo biramo. Dewletî wazenê ke zê Rojawanî ney, zê înan bo. Îta de jû çî eşkera bî. Nê dewletî wazenê ebe şerê rojhilatê mîyanênî dîzayn bikerê ama uza de paradîgmaya Rojawanî de ebe fikir yeno şikildar yeno form. Uza de hem cinîyan hem şaran pêroyî hem zî înan o pêroyîn vat ke ma şîkînîme xo bi xo îdare bikîme. Ma ruyê xo çarnayîme paradîgmaya Rojawanî. Wazenîme ke îta de hem şarê Tirkîya hem partîyê sîyasî seba şer ney seba haştîye qesî bikerê. Na persa Kurmanc çiturî beno çareser uza kî mesele tayê giran o.”
Rejîmê Îmralî domyeno
Çîgdem Kiliçgun Uçar dîyar kerd ke 26 serrî yo ke Îmralî de rejîmê tecrîdî est o û wina vat: “Binê nê tecrîdî de serekê Kurdan birêz Ocalan seba aşîtî seba azadî seba çareserî zaf çî vatî. No vatenê xo no fikre xo seba xelesîyayîşê teyna şarê Kurmancî nê seba xelesîyayîşê şarê Rojhilata Mîyanene zî bî. Her kes goş dano pêro dinya goş dana ser ama Tirkîya vano ke raya mi raya şerî ya ez tecrid keno. Çoka vanîme ke çareserîya persa şarê Kurmancî bi azadîya birêz Ocalanî girêdayîyê jûbînî yo. Nê rayîraşîyaşê ma de ma hem azadîya birêz Ocalanî wazenîme hem kî ebe fikrê Ocalanî çareserîya şarê Kurmanc pêro pîya bikerîme.”
Pîya awan kerdê
Çîgdem Kiliçgun Uçar ard vîr ke 1920an de eke Cumhûrîyeta Tirkîye amê awankerdene şarê Kurmanc û şarê Elewîyan pêro zere der ê û pîya awan kenê û wina qedîna: “Zerê seserrî de polîtîkayê dewlete yê îktîdarî nêvana teyna- polîtîkayê dewlete înkar bî, asîmîlasyon bî yanî estbîyayîşê ma qebul nêkerd. Çînîbîyayîşê ma ser o xo awan kerd. Coka ma vanîme ke çiturkî cumhuriyet awan bî ma zerê awankerdene de bîme nika kî heqê ma yo. Coka lazim o ke parlementoya Tirkîya o gore berpirsyarîye bigîro. Partîyê sîyasî pêro pîya berpirsyarîye bigêrê. Şonê goş danê SMO’yî, goş danê nêzana kamî ama gere raver ruyê xo biçarnê Rojawanî ruyê xo biçarnê şarê Kurmancî. Ma zanîme ke şarê Kurmancî û şarê Tirkî û şarê bînî pêro pîya zanê jû ca de weşîya xo biramê.”
