Şirnex – Parlementer Mehmet Zekî Îrmez di şîna endamê HPGê Adem Kûrtay de destnîşan kir ku divê Tirkiye ji nirxên gelê Kurd re rêzê bigire û wiha got: “Divê Rêberê Gelê Kurd Abdullah Ocalan bigihije azadiya xwe ya fîzîkî.”
Di pêşengtiya MEBYA-Dera Şirnexê de Parlementerê DEM Partiyê yê Şirnexê Mehmet Zekî Îrmez, endam û rêveberên rêxistina DEM Partî û DBPê yên Şirnex û navçeyên wê, endamên Meclisa Dayîkên Aştiyê, aktîvîstên TJAyê û gelek kes bi girseyî serdana şîna endamê HPGê Adem Kûrtay (Dijwar Berxwedan) ê ku 21ê cotmeha 2017an li Zapê jiyana xwe ji dest dabû, kirin.
Dema girse gihişt li cihê şînê ya li taxa Şehîd Harûn, diruşma ‘Şehîd namirin’ berz kir. Di serdana şînê de ewilî ji bo cangiyên azadiyê deqeyeke rêzgirtinê hat lidarxistin.
Parlementerê DEM Partiyê yê Şirnex Mehmet Zekî Îrmez di serdanê de got ku heke îro gelê Kurd gihiştibin asta aştiyeke birûmet bi saya cangoriyên azadiyê ye û wiha axivî: “Ji aliyê dewleta Tirk ve tê axaftin bi saya cangoriyên azadiyê ye. Ji bo ev pêvajoya aştiyê bigigije qonaxekê divê dewleta Tirk ji nirxên gelê Kurd re rêzê bigire.”
Mehmet Zekî Îrmez di berdewama axaftina xwe de bal kişand ser azadiya Rêberê Gelê Kurd Abdullah Ocalan a fîzîkî û axaftina xwe wiha bi dawî kir: “Bi banga Rêzdar Ocalan a 27ê Sibatê pêvajoyek aştiyê dest pê kir. Îro ev pêvajo gihiştiye astekê û divê êdî bi Rêzdar Ocalan re were axaftin û şertên wî werin pêkanîn. Her wiha divê mafê hêviyê yê Ocalan were pêkanîn û Ocalan bigihe azadiya xwe ya fîzîkî.”
Piştre bavê Adem Kûrtay, Haci Kûrtay jî diyar kir ku kurê wî şehîdê hemû gelê Kurd e û sersaxiya tevahiya gelê Kurd û rêvehalên kurê xwe xwest. Piştî axaftinan dua hatin kirin û serdana şînê bi dawî bû.
