Amed-Bi pêşengiya MEBYA-DERê li navçeya Hênê ya Amedê gel bi girseyî çû şîna gerîlayê HPGê Çiyager Amed (Serhat Korkmaz) û got: “Tişta ku şehîdên me ji me dixwazin xwedîderketina li keda wan e.”
Bi pêşengiya Komeleya Piştgirî û Yekitiyê ya ji bo Kesên Xizm û Nasên xwe li Dergûşa Şaristaniyê Windakirinê (MEBYA-DER) bi girseyî çûne şîna gerîlayê HPGê Çiyager Amed (Serhat Korkmaz) ku di nîsana 2024an de li Xakûrkê jiyana xwe ji dest dabû. Merasîma şînê li navçeya Hênê ya Amedê pê hat. Endamên MEBYA-DERê, Hevseroka Rêxistina Partiya Wekhevî û Demokratîk a Gelan (DEM Partî) Gulşen Ozer û endamên meclisa DEM Partiyê, TUAY-DER, Partiya Herêmên Demokratî (DBP), Tevgera Jinên Azad (TJA), Endamên Komeleya Dayîkên Aştiyê, Komeleya 78an, Hevşaredarên navçeyan û gelek kes tev li şînê bûn. Girseya ku li wir amadebû pêşî dua û fatîhe xwendin û piştre jî ji bo kesên ku têkoşîna azadiyê de jiyana xwe ji dest dane deqeyekî rêz girtin. Piştî rêzgirtinê girseyê dirûşmeyên “Şehîd namiri”, “Bijî Serok Apo” berzkirin.
‘Em efûyê naxwazin’
Rêveberê MEBYA-DERê Mehmet Emîn Kiliç ku tev li şîna gerîlayê HPGê Çiyager Amed bû li ser navê saziyê axivî û got: “Serê malbata me û serê Kurdên bi şeref, rêber Apo û hevalan sax be. Em dibêjin xwedê rehma xwe li hemû şehîdên me bike. Tişta ku şehîdên me ji me dixwazin xwedîderketina li keda wan e. Hewceye em di vê pêvajoyê de erka xwe baş bizanibin. Ev ne terorîstî ye. Terorîstiya herî mezin ew e ku mirov li dijî tişta xwedê teala afirandiye derkeve ye, terorîstî ew e. We xwest ku hûn Kurdîtiya me înkar bikin, ciwanên me ji bo xwe biparêzin heta îro ev têkoşîn meşandin. Sûcdar hûnin, we sûc kiriye, tevgera azadiyê sûc nekiriye. Em efûyê naxwazin. Divê hûn wan şaşiyên xwe rast bikin.”
‘Hêvî dikim ku Serhat şehîdê dawiyê be’
Bavê gerîlayên ku jiyana xwe ji dest daye Abdulbakî Korkmaz di şîna kurê xwe de xêrhatina mêvanan kir û got: “Ez di serî de xêrhatina hemû mêvanan dikim. Em jî weke her kesî malbata şehîdan e. Em ne yên pêş in û ne jî yên paş in. Lê ez hêvî dikim Serhatê min bibe yê dawî.”
Herî dawî dema ku dayîk ber bi mala şînê ya beşa jinan ve meşiyan polîsan mudaxeleyî girseyê kir û gotin: “Hûn nikarin bi girseyî bimeşin û dirûşmeyan biavêjin. Avêtina dirûşmeyan sûc e.”
