MEBYA-DERê, rêxistina DEM Partî û DBPê yên Amedê bi girseyî çûn serdana şîna Yunus Balkaş.
Navenda Çapemeniyê ya YPGê ragihandibû ku endamê wan Yunus Balkaş (Xebat Rizgar) 18ê Sibatê li Der Hafira Rojava di erişêkî hewayî de jiyana xwe dest dabû. Ji bo Yunus Balkaş li navçeya Licê ya Amedê şîn hat danîn.
Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER), rêxistinên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) yên Amedê û navçeyên wê bi girseyî çûn serdana şîna Yunus Balkaş.
‘Em ê xwedî li doza wan derkevin’
Li şîne Hevserokê MEBYA-DERê Mehmet Emîn Kiliç diyar kir ku di dîroka cîhan û gelan de dema ku gelekî bi tunebûn û îmhakirinê rû bi rû dimîne bi awayek xwezayî li ber xwe dide û got: “Di nava gelê Kurd jî egîd û leheng diderkevin. Şehîd Xebat Rizgar jî yek lehengê vî gelî ye. Ji bo ku em rizgar bijîn çûn tiştê herî girîng canê xwe dan. Me gelek bedelên giran dan, ev bedel gelekî bi nirx û hêja ne. Tevgera azadiyê; gelê Kurd anî ve astê ku tevahî cîhan gelê Kurd nas dike û dibîne. Em soz didin ku em ê xwedî li doza wan derkevin.”
