DEM Partî li Qada Esenyurtê “Ji bo azadiyê mitînga aştiyê” li dar xist. Bi hezaran welatî ji bo azadiyê kom bûn û daxwazên xwe yên aştî û azadiyê anîn ziman.
Partiya Wekhevî û Demokrasiyê ya Gelan (DEM Partî) di çarçoveya peyamên Rêberê PKKê Abdullah Ocalan ên di hevdîtinên dawî de, mîtînga “Çalakiyên Aştiya Civakî û Azadiyê” li dar xist. Di çarçoveya xebatê de li Qada Esenyurtê ya Stenbolê bi dirûşma “Ji bo azadiyê ked, edalet û aştî” mitîngê li dar xist. Xelkê bajar ji bo mitîngê ji saetên serê sibehê ve derket rê. Li qada mitîngê pankarta “Ji bo azadiyê ked, edalet û aştî” daliqandin. Heverdevka Kongreya Demokratîk a Gelan (HDK) Meral Daniş Beştaş û Hevseroka Giştî ya DEM Partiyê Tulay Hatîmogûllari jî tev li mitîngê bûn.
‘Teqez dê azadî bi ser bikeve’
Hevseroka DEM Partiyê ya Stenbolê Gonca Yangoz di mîtîngê de girse silav kir û wiha got: “Îro em li vir i bo em dengê aştî û azadiyê bilind bikin em hatin vir. Ji bo em têkoşîna dayikên aştiyê bilind bikin em li vir in. Teqez dê azadî û aştî bi ser bikeve.”
‘Em ji bo aştî û azadiyê amade ne’
Hevserokê DEM Partiyê yê Stenbolê Murat Kalmaz jî axivî û wiha got: “Em ji bo azadiya gelê kurd û tirkiyeyê amade ne. Ji bo em ji bo aştiyê amade ne. Em di rojên dîrokî re derbas dibin. Em van rojên dîrokî vegerînin rojên aştî û demokrasiyê. Ji bo vê yekê çi tikêve ser milê me em amade ne. Em ê xeta xwe ya berxwedanê, aştî û azadiyê mezin bikin. Bijî berxwedana gelê kurd û Tirkiyeyê.
‘Serkeftin nêzîk e’
Ji Înîsiyatifa Dayikên Aştiyê Rewşan Guler jî derketi ser dikê û gel silav kir. Rewşan Guler girse silav kir û wiha got: “Em li ser navê dayikên aştiyê wekî dayikên we hemûyan silav dikin. Silav û rêzên xwe ji hemû dayikan re dişînin. Yên ku li vî welatî aştiyê dixwazin em silavên xwe ji wan re dişînin. Em dixwazin piştgiriyê bidin vê aştiye ku ev mase dîsa neyê hilweşandin. Em 25 sal in ji bo aştiyê têkoşîna vî welatî didin. Em di vê sedsalê de bi hevî ne ku pêvajoyek nû dest pê bike. Em dixwazin hemû kesên aştiyê dixwazin berpirsiyariyê bidin ser xwe. Em daxwaza aştî û wekheviyê dikin. Di şerê 50 salan de pêş ket, zerarek mezin da gel. Şer zerarê dide aborî, civakê û her kesî. Kurd aştî dixwazin. Lê em dixwazin aliyê hemberê jî samîmî û wêrek tev bigere. Dema şer tune be dê serkeftin, aştî û edalet pêş bikeve. Dema aştî, edalet û wekhevî pêş bikeve dê hemû kes bi ser bikeve. Em bang li dayikên leşker û polîsan dikin. Hêsir û êşên dayikan tev yek e. Dema darbestên zarokên wan tê, bila nebêjin bila welat sax be. Dema aştî hebe dê her tişt hebe. Divê her kes ji bo aştiyê têbikoşin û em hemû bi hevre qezenc bikin. Em dixwazin hevdîtinên li Îmraliyê bidomin. Qeyûm aştiyê nînin. Serkeftin nêzîk e. Em ê bi ser bikevin.”
