Nûnerê Ewlehiya Neteweyî yê Hikûmeta Trump ê berê John Bolton diyar kir ku Serokwezîrê Îsraîlê Benjamîn Netanyahu di hevdîtan bi Trump de daxwazên xwe bi dest xistine. Bolton diyar kir ku ji holêrakirina rejîma Îranê ji bo ewlehî û aştiya herêmê gelek girîng e û dem dema têkbirina rejîmê ye.
Nûnerê Ewlehiya Neteweyî yê Hikûmeta Trump ê berê John Bolton di makaleyek ji Îndependent Erebiya re nivîsandî de pêşketinên li Rojhilata Navîn nirxand. Bolton diyar kir ku ji bo kesên ku li aştî û ewlehiya herêmî ya mayînde digerin, pirsa bingehîn ew e ku di nav hejmarek pirsgirêkên jeostratejîk de pêşîniyên rast were destnîşankirin. Bolton anî ziman ku bêçekirina Hamasê ji bo Îsraîlê girîng e lê ji wê zêdetir tişta girîng gefên ji Îranê tên e.
‘Gefa sereke rejîma Îranê ye’
Bolton di gotara xwe de bal kişand ser van mijaran: “Berdewamiya her aştî û ewlehiyê li Rojhilata Navîn bi rakirina gefên ku ji hêla Tehranê ve têne çêkirin ve girêdayî ye. Hem ji bo cîranên wê yên li herêmê û hem jî ji bo cîhanê bi giştî. Divê Îsraîl bi taybetî ji vê rastiyê haydar be û destûr nede ku meseleya Xezeyê bikeve pêşiya gefên ji Îranê tên. Niha mijara rehîneyan heta astekê çareser bûye û ev yek çewsa li ser Netanyahû kêm dike.”
‘Netanyahu dikare bala xwe bide gefên stratejîk’
Têkildarî mijarê Bolton diyar dike ku êdî divê Netanyahu bala xwe bide ser gefên stratejîktir û got: “Gefa stratejîk jî bi taybetî Îran e. Lêbelê ji bo vê yekê pêwistî bi alîkariya DYAyê heye. Netanyahu dixwest garantî bike ku Trump jî dê bala xwe bide ser Îranê. Heta niha Netanyahû di vî warî de serkeftî ye û di hevîtina dawî de jî piştgiriya pêwist girt. Lê ji bo ku bikaribe hemleyê li hemberî Îranê bike pêwistiya Îsraîlê bi alîkarî û qenebe bi erêkirina dewletên ereban hebû. Peymanên Îbrahîm di vî warî de faydeyek mezin dan.
‘Paşguhkirina Îranê xwe xapandin e’
Bolton anî ziman ku piştgiriya Tehranê ji bo Hamas, Hizbullah û komên din ên wekîl berdewam dikin û di heman demê de vejandina bernameyên wê yên nukleerî û mûşekên balistik jî zêdetir dibin. Bolton ev xal anîn ziman: “Ev gef ji bo Îsraîlê xetereke hebûnî ya bêguman çêdikin. Paşguhkirin an jî kêmkirina girîngiya cidiyeta vejîna Îranê dê wekî xwexaqandinê be. Ji ber pêşketinên navxweyî yên li Îranê, destnîşankirina pêşîniyên stratejîk ên rast her ku diçe girîngtir dibe. Rewşa aborî car bi car xirabtir dibe û dibe sedema xwepêşandanên berfireh ên gel.”
‘Dema têkbirina rejîma Îranê ye’
Bolton bi bîr xist ku krîza aborî ya Îranê serhildanên gel geş dike û bal kişand ser van xalan: “Gelek çavkaniyên dibin sedema serhildanê hene. Ku em aciziya ciwan, jin, Kurd û Ereban jî lê zêde bikin dê rewş baştir bê dîtin. Ev yek asta peyrana piştî mirina Serokê Olî Elî Xamaney jî radixe berçavan. Niha dema zêdekirina çewsa derveyî ya li ser rejîmê û têkbirina wê ye. Ji bo pêşîgirtina talûkeyên li Rojhilata Navîn jî ev yek pêwist e. Îro divê hemû bal li ser Îranê bin.”
