Şirnex – Cerdevanên gundê Şerefiyê û Darayê li Çiyayê Gabarê daristanan dibirin û êzingan bidizîka dibin navenda Sêrt û Şirnexê difiroşin û her wiha êzingan dibin qeleqolên leşkeran.
Li Şirnex her çiqas rayedarên dewletê daxuyaniyên weke, “birîna daristanan hatiye rawestandin” bide jî pêkanînên rayedaran û destûrdayîna wan a cerdevanan ji hev nagire. Waliyê Şirnexê gelek caran di hevdîtinên bi saziyên civaka sivîl re gotiye, “me birîna daristanan rawestandiye” lê wêneyên beriya 2 rojan hatine kişandin û gihiştin ber destê me daxuyaniya waliyê Şirnex diderewîne.
Cerdevanên gundê Şerefiyê û Darayê talanê dikin
Li gorî agahiyên çavkaniyên ji herêmê dane ajansa me; cerdevanên gundên Şerefiyê û Darayê yên Şirnex ev 3 roj in dest bi birîna daran kirin e. Ji bilî cerdevanan hin şêniyên van gundan jî alikariyê didin talanê.
Bi awayekî dizî êzingan dibin Sêrt û Şirnexê
Cerdevan li gundê Xursê yê bi ser navçeya Dihê ya Sêrtê ve û li gundê Spîvyan ê bi ser navenda Şirnexê ve daran dibirin û bi awayek dizî êzingan dibin navendên Sêrt ê Şirnexê. Di wêneyên hatine ber destê me de jî xuya dike ku êzing li kamyonetên biçadirkirî hatine barkirin û dibin. Vê yekê jî ji bo êzing xuya nekin û nerazîbûn neyê nîşandan dikin.
Êzingan dibin qeleqolan
Çavkiyên pêbawer yên xwecihî ragihandin ku êzingan bi kamyon û traktoran dibin navenda Sêrt û Şirnexê û her wiha êzingan ji bo amadekariya zivistanê dibin qeleqolên artêşa Tirk ên li çiyayên Cûdî, Gabar û Çiravê.
