3yemîn Daîreya Cezayan a Dadgeha Bilind 10 sal û 5 meh cezayê hefsê yê Hevşaredara Artemêtanê ya bere Rojbîn Sevîl Çetîn erê kir.
Cezayê hefsê yê 10 sal û 5 mehan ku bi îdiayên “endamtiya rêxistinê” û “muxalefeta li dijî qanûna civîn û xwepêşandanan” li Hevşaredara Artemêtanê ya Wanê ya bere Rojbîn Sevîl Çetîn hatibû birîn, ji hêla 3yemîn Daîreya Cezayan a Dadgeha Bilind ve hate erêkirin.
Rojbîn Sevîl Çetîn ku di sala 2014an de hatibû hilbijartin û di dema hevşaredartiya xwe de gelek caran hate binçavkirin û girtin, herî dawî di 7ê Tîrmeha 2020ê de hate girtin û şandin Girtîgeha Jinan a Amedê. Di danişîna Rojbîn Sevîl Çetîn de ya di 26ê Gulana 2023yan de ku li 2yemîn Dadgeha Cezayên Giran a Wanê hate lidarxistin, bi îdiaya “endamtiya rêxistinê” 10 sal û bi îdiaya “muxalefeta li dijî qanûna civîn û xwepêşandanan” jî 5 meh cezayê hefsê hate birin. Xebatên jinan û yên partiyên siyasî weke hinceta cezayê hate nişandan. Li gel vê, hevdîtinên bi endamên meclisa şaredariyê û hevşaredaran re û îfadeyên şahidên nepen jî weke hinceta cezayê hatin nişandan.
3yemîn Daîreya Cezayan a Dadgeha Bilind, îdia kir ku kirariyên di pêvajoya darizandinê de li gorî usûlê ne û tevahiya delîlên ji bo cezayê hatine nîşandan hiqûqî ne û b ceza erê kir.
Parêzera Rojbîn Sevîl Çetîn, Ekîn Yeter diyar kir ku cezayê hatiye dayin bi temamî li gorî îfadeyên şahidên nepen, çalaki, xwepêşandan û xebatên jinan hatiye dayin û bi vê yeke re mafê parastin û darizandina adilane, azadiya fikir û xweîfadekirinê, azadiya çalaki û xwepêşandanan hatine binpêkirin. Ekîn Yeter bi van sedeman jî dê serî li Dadgeha Destûra Bingehîn (AYM) bide.
