Amed – ÎHDê bi konferansekê malbatên gerîla û leşkeran anîn cem hev. Dayikên beşdarî konferansê bûn, xwestin tevahî dayîk destê xwe bidin destê hev û li dora aştiyê bibin yek.
Navenda Giştî ya Komeleya Mafê Mirovan (ÎHD) li otela Mîtanîa ya li Amedê konferans li dar xist. Konferans di navbera 21 û 22 Hezîranê de bi şîara “Rêya Diçe Azadiyê: Bîr û Edalet” pêk tê. Di konferansê de malbatên gerîla û leşkeran hatin cem hev. Kesên ku beşdarî konferansê bûn ji Ajansa Welat (AW re axivîn.
Ji bo aştiyê ji Roboskiyê hat
Ji dayikên Roboskiyê dayîka bi navê Halîme Encu destnîşan kir ku ew dayîka Serhat Encu ye û ji bo aştiyê hatiye Amedê û got: “Ez ji Roboskî hatime vir. Min gelek zor û zahmetî dît. Gelek xizmên me hatin kuştin. Di malbata me de 11 kes hat kuştin. Xwedê mafê me ji wan re nehêle. Ez dibêjin aştî û edalet. Divê qanûnên nû derxin. Divê dewlet bi birêz Abdullah Ocalan re hevdîtinê pêk bîne. Em tenê maf û zimanê xwe dixwazin. Ez ji bo aştiyê hatime vir. Bila dayîkên leşker û polisan êdî nebêjin ‘Bila welat sax bî.’ Bila destê xwe bidin deste me.”
‘Em bi hevre aştiyê bixwazin’
Dayika bi navê Emîne Çagirga ku ji Cizîrê hat Amedê jî xwest bi hevre aştiyê biparêzin û got: “Ez Dayîka Cemîle Çagirga me. Ez ji bo aştiyê hatime vir. Divê em destê xwe bidin destê hevdu û aştiyê bixwazin. Dema şerên xweseriya demokratîk leşkeran mala me topbaran kir. Di malbata me de 7 kes hatin kuştin. 7 kes jî birindar bûn. Keçika min a mezin jî di nava wan de bû. Paşê keça min Cemîle jî hat kuştin. 8 kes di malbata me de kuştin. Lê ez dîsa dibêjim aştî. Em aştiyê dixwazin. Êdî bes e. Kezema me şewitî bila êdî ya tu kesên din neşewite. Ewqas dayik dibêjin aştî. Divê êdî gav bên avêtin. Ku heta niha bi destê dayîkan hatibuya girtîn, niha aştî hatibuya welatê me. Pêvajo destpêkiriye. Lê tu gav ji bo malbatan hîn nehatiye avêtin. Divê dewlet gavan biavêje û êdî xwîn nerije.”
‘Ku kujerên Roboskiyê hatiban darizandin!’
Yek ji mexdûrên şer Velî Encû ye. Velî Encu jî ji Roboskê hat beşdarî konferansê bû. Velî Encu jî anî ziman ku ew li ser bi navê malbata Roboskî hatine vir û wiha axivî: “Ez vê yekbûna li vir gelek giring dibinim. Ji ber ku malbatên Kurdan û Tirk li vir in. Û eşên xwe bi hev re parve dikin. 14 sal berê gundê Roboskê bombe kirin. Di êrîşa hewayî de 34 gundî hatin kuştin. 11 ji wan xizmên min bûn. Piştî ve komkujiyê daxwaza me ew bû ku berpirsiyar bên darizandin. Me xwest berpirsiyarên leşkerî û yên siyasî bên darizandin. Ji ber li pişt vê komkujiya Roboskiyê aliyê siyasî heye. Piştî komkujiya Roboskî gelek komkujî pêk hat. Eger piştî komkujiya Roboskiyê berpirsiyar hatibûna darizandin, dê kujerên komkujiyên din jî hatibana darizandin. Berpirsiyarên wan komkujiyan nehatin darizandin. Di navbera 2013 û 2015an de gavên aştiyê hat avêtin. Lê pêvajo xera bû û şer dest pê kir. Di van demên dawiyê de dîsa pêvajoya aştiyê dest pê kiriye. Em wekî malbatên Roboskiyê piştgiriyê didin pêvajoyê. Îro ku eşên li vê konferansê tê ziman hemû sedema şer û zordariya gelan e. Em bawerin ku ew bisekinin dê aştî û edalet jî pêk werê.”
