Dayikên Aştiyê yên ji bajarên Bakurê Kurdistanê û Tirkiyeyê hatin Enqereyê piştî daxuyaniya li ber Wezareta Karên Derve serdana nobeta ÎHDê ku li dijî êrişên ser Şêxmeqsûd û Eşrefiyê îro da destpêkirin, kir.
Dayikên Aştiyê li dijî êrişên çeteyên HTŞê û SMO yên li ser taxên Şexmeqsûd û Eşrefiyê yên Helebê ji bajarên Bakurê Kurdistanê û Tirkiyeyê hatin Enqereyê û nîvro li ber Wezareta Karên Derve ya Tirk daxuyanî dan. Dayikên Aştiyê piştî daxuyaniyê serdana nobeta Komeleya Mafên Mirovan (ÎHD) ku li dijî êrişên li ser Şêxmeqsûd û Eşrefiyê da destpêkirin, kir. Dayikên Aştiyê li ber komeleyê bi çepikan hatin pêşwazîkirin.
Li eywana avahiya şaxa ÎHDê ya Enqereyê daxuyaniya nobede ji aliyê rêveberê ÎHDê Tanju Gunduzalp ve hat xwendin. Tanju Gunduzalp anî ziman ku êrişên li ser Şêxmeqsûd û Eşrefiyê li dijî mirovahiyê bûn û bang li Tirkiyeyê kir ku piştgiriya komên çekdar û êrişan neke. Tanju Gunduzalp diyar kir ku ji bo ew li dijî êrişan rabin dest bi nobedê kirin û got: “Me îro li dijî êrişan dest bi çalakiya nobedê kir. Nobeda me piştî îro dê roja Sêşemê dîsa li avahiya me bidome. Her hefteyê saziyek dê nobede li vir bigire. Heta êriş rawestin nobeda me dê bidome.”
Hevserokê Giştî yê ÎHDê Cîhan Aydin jî destnîşan kir ku ew piştgiriya çalakiya Dayikên Aştiyê dikin û wiha got: “Em ê jî li dijî van êrişan dengê xwe derxînin. Em hêvî dikin aştiyeke mayînde pêk were û dilê we dayikan jî aram bibe. Divê Tirkiye piştgiriya komên çekdar neke.”
Dayikên Aştiyê jî bertek nîşanî êrişên li dijî taxên Şêxmeqsûd û Eşrefiyê û hevkariya Tirkiyeyê dan û xwestin êriş bên rawestandin.
