Stenbol – Dayikên Şemiyê aqûbeta Suleyman Cîhanê ku berî 44 salan di bin çavan de hatibû windakirin pirsin û daxwaza cezakirina kiryarên wî kirin.
Dayikên/Mirovên Şemiyê di hefteya 1061an a çalakiya xwe de ji bo ku çarenûsa xizmên xwe yên hatine kuştin û windakirin bipirsin û edaletê bixwazin li Qada Galatasarayê kom bûn. Dayikên Şemiyê di çalakiyê de wêneyên xizmên xwe yên hatine windakirin, qurnefîl û wêneyekî Emîne Ocak a ku di 23yê Tîrmehê de jiyana xwe ji dest dabû, hilgirtin. Vê hefteyê, Dayikên Şemiyê ji bo Suleyman Cîhan ê ku di sala 1981an de di binçavan de bi îşkenceyê hatibû kuştin û dû re hatibû îdiakirin ku xwe kuştiye, çalakiya xwe li dar xistin.
Metna daxuyaniyê Mirova Şemiyê Aysel Ocakê xwend.
Aysel Ocak, destnîşan kir ku Suleyman Cîhan ê 31 salî di 29ê Tîrmeha 1981an de dema dihat Stenbolê ji aliyên polîsên sivîl ve pêşiya wî hatibû birîn û binçavkirin, dema malbata wî bi parêzeran re serî li dozgeriyê dide dozger bersiva ne di bin çavan de ye dide wan. Aysel ocak, diyar kir ku rayedaran di destpêkê de rave kirine ku Cîhan di pevçûnan de hatiye kuştin pişt re jî îdia kirine ku xwe ji qatê 6an avêtiye xwarê. Aysel Ocakê ev tişt got: “Piştî israra malbat û şahidan rastî derket holê. Suleyman Cîhan ê ku di 29ê Tîrmeha 1981’an de hatiye binçavkirin li Şaxa Siyasî ya Midûriyeta Polîsan a Stenbolê bi rojan tê îşkencekirin û hatiye kuştin. Piştre laşê wî ji qata şeşan diavêjin û îdia dikin ku xwe kuştiye. Ji bo winda bikin bi nasnamaye ‘nediyar’ li Goristana Zindanarkasi defin dikin.”
‘Çîroka windakiriyan dişibin hev’
Pişt re birayê Suleyman Cîhan, Ahmet Cîhan wiha axivî: “Çîroka windayan her tim dişibin hev. Hişmendiya qedexekar û bêcezakirin. Ev qad navenda bîra me ye. Ev qad qada heqîqet û edaletê ye.”
‘Heta windayê me yê dawîn bê dîtin em ê dev jê bernedin’.
Pişt re keça Emîne Ocak, Masîde Ocak dayîka xwe bi bîr anî û ev tişt got: “Ne ev qad tenê, avahiyên li hemberî me, çûkên li ser têlan, qurnefîlên ku her şemiyê têne vir, wêneyên li vir tên daliqandin em û hûn tev şahid in. Me sozek da diya xwe: ‘Heta windayê me yê dawîn bê dîtin em ê dev jê bernedin’.
Çalakî piştî ku qurnefîl li Qada Galatasarayê hatin danîn bi dawî bû.
