Amed – Rêxistina DBPa Amedê dê di 27ê Nîsanê de 6emîn Kongreya Xwe ya Awarte li dar bixe. Hevserokên DBPê yên Amedê Mehmet Şirîn Gurbuz û Sûltan Yarayê gel vexwendin kongreya xwe û diyar kirin ku kongreya wan dê bibe wesîleya rêxistinkirina aştî û civakeke demokratîk.
Rêxistina Partiya Herêmên Demokratîk (DBP) a Amedê dê bi dirûşmeya “Bi Civaka Rêxistinkirî re Em Ber bi Azadiyê ve Dimeşin” dê 27ê Nîsanê roja yekşemê saet di 11.00an de li Eywana Dawetê ya Ayaz Elegansê 6emîn Kongreya Xwe ya Awarte li dar bixe. Rêxistina DBPê ku xwe amade dike bi coşeke mezin kongreya xwe li dar bixe bi gotina “Beşdarbûna We dê Hêza Me Geş Bike” hemû gel, sazî û dezgeh vexwendin kongreya xwe. Hevserokên DBPê yên Amedê Mehmet Şirîn Gurbuz û Sûltan Yarayê jî diyar kirin ku dê bi rêxistinkirineke xurt kongreya xwe li dar bixin û kongreya wan dê bibe wesîleya rêxistinkirina aştî û civakeke demokratîk.
‘Em ber bi azadiyê ve dimeşin’
Hevserokê DBPê yê Amedê Mehmet Şirîn Gurbuz diyar kir ku dê kongreya xwe bi coşeke xurt li dar bixin û wiha got: “Em ê li Amedê bi rêxistinkirineke xurt kongreya xwe li dar bixin. Em ber bi azadiyê ve dimeşin. Ji ber vê yekê ev kongreya me ya Amedê gelekî girîng e. Ji bo tecrîd were rakirin û civakeke demokratîk were avakirin meşa me berdewame. Em bang li gelê Amedê dikin ku tev li kongreya me ya Amedê bibin û piştgiriyê bidin.”
‘Em dixwazin li gorî ruhê pêvajoyê kongreyê li dar bixin’
Hevseroka DBPê ya Amedê Sûltan Yarayê jî bang li gelê Amedê û bajarên derdorê kir ku hêzê bidin kongreya wan. Sûltan Yaray bal kişand ser banga “Aştî û Civaka Demokratîk” a Rêberê Gelê Kurd Abdullah Ocalan û wiha got: “Em dixwazin li gorî ruhê vê pêvajoyê kongreya xwe li dar bixin. Civaka rêxistibûyî civaka azad e. Werin em di vê kongreyê de ji bo rêxistinkirina xwe ji bo azadiya gelê kurd û gelên Kurdistanê peyamên xurt bidin. Hêvî û daxwaza me ew e ku wê ev kongre piştgiriyê bide vê pêvajoya ku bi banga Rêberê Gelê Kurd Birêz Abdullah Ocalan dest pê kir. Piştî vê bangawaziyê gelê kurd bi pratîka xwe pêvajoyeke nû da destpêkirin lê niha ji aliyê dewletê ve gavên erênî nehatine avêtin. Ji ber vê yekê em dibêjin werin em di vê kongreyê de dengê xwe bilind bikin û da ku dewleta Tirkiyeyê bersivê bide vê pêvajoyê.”
Sûltan Yaray, destnîşan kir ku tecrîda li ser Rêberê Gelê Kurd hêj berdewam dike û wiha berdewam kir: “Daxwaz û hêviya gel ew e ku ev tecrîd rabe û birêz Abdullah Ocalan bi awayekî fizîkî azad bibe û ew bi xwe vê pêvajoyê li ser maseya muzakereyê bimeşîne. Bila gelê me were piştgiriyê bide ku em bi hev re kongreya xwe li dar bixin.”
