Şandeya DEM Partî û DBPê ku ji 6 kesan pêk tê, li Silêmaniyê bi Tevgera Goran re civiya. Di civînê de behsa pêvajoya nû, rola aliyên siyasî yên Başûrê Kurdistan ya di pêvajoyê de hate kirin.
Duh şandeyek ji Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP), ku ji 6 kesan pêktê serdana Başûrê Kurdistanê kir.
Di nava şandeya DEM Partî û DBP’ê de ku serdana Başûrê Kurdistanê kiriye, Hevserokê DBP’ê Keskîn Bayindir, Hevberdevkên Têkiliyên Derve yên DEM Partiyê Berdan Ozturk û Ebrû Gunay, Parlamentera DEM Partiyê ya Mêrdînê û Amîra Îdarî ya Meclisa Tirkiyeyê Saliha Aydenîz û Endama Tevgera Jinên Azad (TJA) Adalet Fîdan cih digirin.
Şandeya DEM Partî û DBPê îro li Silêmaniyê serdana baregeha sereke ya Tevgera Goran kir. Şande ji aliyê Rêveberê Giştî yê Tevgera Goran Dana Ehmed Mecîd, sekreterê Civata Nîştimanî Şêx Kamîl Şêx Qadir, Rêveberê Peywendiyên Siyasî Bextiyar Umer, Serokê Fraksiyona Tevgera Goran ya li Parlamentoya Herêma Kurdistan Ciwanro Mihemed û nûnera jinên Tevgera Goran Gulistan Seîd ve hate pêşwazî kirin.
Piştî civînê Hevserokê DBP’ê Keskîn Bayindir daxuyaniyek çapemeniyê da û got; “Dema em cara ewil hatin Başûr, ji ber dema kêm, me nekarî em bi hemû aliyên siyasî re bicivin, lewma em carek din hatin Başûrê Kurdistanê. Em îro bi birayên xwe yên Tevgera Goran re civiyan û me behsa pêvajoya çareseriyê ya li Bakur, Tirkiye û guhertinên li Rojhilata Navîn kir. Tevgera Goran jî piştgiriya xwe ya ji bo çareseriyê eşkerekir û em spasiya helwesta wan dikin.”
Serokê Fraksiyona Tevgera Goran ya li Parlamentoya Herêma Kurdistan Ciwanro Mihemed jî axivî û got; “Me pêşwazî li şandeyê kir û me piştgiriya xwe ya ji bo pêvajoya aştî û çareseriyê ya li Bakurê Kurdistanê ragihand.
Hêjayî gotinê ye şandeya Îmraliyê ya DEM Partiyê jî di 15yê Sibatê de serdana Başûrê Kurdistanê kiribû, di nava 3 rojan de bi Serokê PDKê Mesûd Barzanî, Serokê Herêma Kurdistanê Nêçîrvan Barzanî, Serokê YNKê Bafil Talabanî, Cîgirê Serokê Hikûmeta Herêma Kurdistanê Qubad Talebanî û Serokê Hikûmeta Herêma Kurdistanê ya demborî Mesrûr Barzanî û Endamê Dîwana Serokatiyê ya YNK’ê Şanaz Îbrahîm Ehmed re hevdîtin pêk anîbû, û silav û peyamên Rêber Apo yên têkildarî pêvajoya nû ragihandibûn.
