Bi hazaran kesên ku ji bo “Mitînga Aştiyê” berê xwe dan qada Rihtimê ya Stenolê, bi dirûşmeyên “Jin Jiyan Azadî” û “Bijî Serok Apo” bal kişandin ser xwe.
Bi deh hezaran kesên ku gihişt qada mîtîngê li qadê posterê mezin ê Rêberê Gelê Kurd Abdullah Ocalan vekir û dirûşmeya “Bijî Serok Apo” berz kir.
Hêzên Ked, Aştî û Demokrasiyê ya Stenbolê dê bi boneya 1ê Îlonê Roja Aştiyê ya Cîhanê, li Qada Rihtimê ya Kadikoyê bi dirûşma “Li dijî şer û kedxwariyê dê demokrasî û aştî bi ser keve” mitîng organîze kir. Partiyên siyasî, rêxistinên civaka sivîl û înîsiyatîf, beriya mitîngê li Rawestgeha Sogutluçeşmeyê kom bûn dest bi meşê kirin. Girseyê stran got û govend gerand. Li rawestgehê dovîz rakirin û dirûşman “Bijî Serok Apo” û “Jin, jiyan, azadî” berz kir. Piştî girse kom bû ber bi qada mîtîngê ve meşiyan. Înîsiyatîfa Dayikên Aştiyê bi pankarta “Hawirdora aştiyê ew e ku em bikaribin bi zimanê xwe yê dayikê li her derê bi serbestî biaxivin”, Înîsiyatîfa Pêdiviya Min bi Aştiyê heye bi pankarta “Dengê aştiyê em bi piştevaniya jinê diqîrin”, DEM Partî bi “Ji bo civaka demokratîk deng bide aştiyê”, Meclisa Jinan a DEM Partiyê bi pankarta “Rêya aştiyeke birûmet civaka sosyalîst demokratîk û azadîxwaz e”, Meclisa Ciwanan a DEM Partiyê bi pankarta “Bi hevrêtiya komunalîst em tecrîdê dişikînin” û MATUHAYDER jî bi pankarta “Dawî li taloqkirina tehliyeyan bînin ji girtiyan re azadî” meşiyan.
Girseyê di meşê de bi pankartên xwe bal kişandin ser gavên ji bo civaka demokratîk û daxwaza perwerdeya bi zimanê Kurdî kirin. Dayikên Aştiyê, di meşê de wêneyên rojnameger Hêro Bahadîn, rojnameger-nivîskar Nagihan Akarsel û Dayikên Şemiyê û Dayikên Aştiyê yên ku jiyana xwe ji dest dayin jî hilgirtin.
Jinan bi cilên xwe bal kişandin ser xwe
Jinên ku bi cilûbergên Kurdî, bi şalên kesk, sor û zer pêşengtiya meşê kirin, tililî avêtin û gelek caran dirûşmên “Bijî berxwedana zindanan”, “Bila zindan birûxin ji girtiyan re azadî”, “Bijî Serok Apo”, Bê Serok jiyan nabe”, “Gelê Filistînê bi tenê nîne” û “Bijî berxwedana Rojava” berz kir.
Piştî girse gihiştî Qada Rihtimê, mitîng dest pê kir.
