Li Kobanê nexweşxaneyek taybet ji bo cenazeyê zarokê 8 mehî ku jiyana xwe ji dest dabû pere ji malbatê xwestiye. Hat zanîn ku Desteya Tenduristiyê ya Kobaniyê bûyer bihîstiye û ji bo malbatê ketiye tevgerê.
Li Kobanê ku 24 roj in di dorpeçe de ye pitikê bi navê Xelîl Mislim ê 8 mehî jiyana xwe ji dest da. Pîrika wî Xufre Mihemed ku tev li bultena Rûdaw TVyê bû diyar kir ku nexweşxaneya li Kobanê ji bo cenazeyê neviyê wê radest bike, ji malbatê 400 dolar pere xwestiye. Malbatê li ser vê yekê pere deyn kiriye û bi wî awayî cenazeyê zarokê xwe wergirtiye. Têkildarî mijarê ajansa me xwe gihand çavkaniyên li Kobaniyê û derbarê bûyerê de çend hurgilî bi destxistin û bûyer piştrast kir.
Nexweşxaneya taybet a ‘Emel’ ji malbatê pere xwestiye
Hat zanîn ku nexweşxaneya taybet a ‘Emel’ li Kobanê xizmetê dide, ji malbata zarokê mirî pere xwestiye. Xwediyê nexweşxaneyê welatiyekî Kurd ê ji Kobanê ye. Tekildarî mijarê çavkaniyan ji ajansa me re ragihandin ku Desteya Tenduristiyê ya Kobanê bûyer bihîstiye û bi mijarê û malbatê ve mijûl dibe.
