Li gor saziyên mafên mirovan di xwepêşandana 28ê Kanûna 2025an dest pê kirine li Rojhilatê Kurdistanê û Îranê heya îro 6961 kes hatin kuştin û 11021 kes jî birîndar bûn.
Saziya Mafên Mirovan a Îranê (HRANA) di roja 42emîn de rapora xwe ya têkildarî binpêkirinên mafên mirovan parve kir. Di raporê de hate diyarkirin ku di xwepêşandanên li Rojhilatê Kurdistan û Îranê heya niha herî kêm 6 hezar û 961 xwepêşandan hatine kuştin. Heman rapor diyar dike ku 51 hezar û 465 xwepêşandêr jî heya niha hatine binçavkirin û zêdetirî 11 hezar û 21 xwepêşandêr jî birîndar bûne.
Li gorî raporê 6 hezar û 507 xwepêşandêr û 176 zarokên temenê wan di bine 18 saliyê de jî ji aliyê rejima Îranê ve hatin kuştin. Herwiha heya niha 214 hêzên leşkeri yên rejîma Îranê jî hatin kuştin. Herwiha 62 welatiyên ku tevlî xwepêşandêran nebûne ji hêla hêzên rejîmê ve hatine kuştin. Hat gotin ku heya niha 11 hezar û 480 kes ji hêla sazî dezgehên darê ve ve ji bo dayîna îfadeyê hatine vexwendin û 311 xwepêşandêr jî bi darê zorê neçarî îtîrafkariyê hatine kirin.
Terora Îdamê: Di rojekê de 13 darvekirin
Rejîma Îranê, cezayê îdamê weke amûreke sîstematîk a zext û çewisandinê bi kar tîne. Li gorî agahiyên ku saziyên mafên mirovan yên Îranê ragihandine, rejîma Îranê sibeha şemiyê li girtîgehên bajarên cuda yên welat, herî kêm 13 kes darve kirin.
Rêxistina mafên mirovan ji 13 kesên hatine darvekirin nasnameya 10 kesên piştrast kir. Li gorî vê yekê, navê kesên ku hatine darvekirin wiha ne: “Elî Feza Xoşneşîn, Ferşad Şeyxî, Evîn Surxî, Cefer Feryadî, Elî Serlekabad, Soşa Muradî, Behzad Meşayexî, Mihemed Elî Seîdlû, Murad Golî û Ebûlfezl Neqevî.” Hat diyarkirin ku xebatên ji bo tespîtkirina nasnameya sê kesên din berdewam dikin.
Rêxistinên mafên mirovan bang li raya giştî ya navnetewî kir ku ji bo rawestandina îdamên zêde yên li Îranê, gavên bandortir û şênber biavêjin.
